Flash News

Sherr mes adoleshentëve, 15-vjeçari përfundon në spital

Konstituimi i Kuvendit të Kosovës, dështon edhe propozimi për votim të fshehtë

Aksident në aksin Peqin–Elbasan, plagosen rëndë dy persona

‘Fight, fight, fight’/ PD-ASHM drejt fitores historike, LaCivita mobilizon fushatën në takimin me kandidatët

Makina përplas këmbësoren në aksin Korçë – Pogradec, ndërron jetë 43-vjeçarja

OP-ED

Ora e ringritjes dhe zgjimit kombëtar dhe mërgata shqiptare

Politiko 8 Dhjetor 2018, 13:10

Ora e ringritjes dhe zgjimit kombëtar dhe mërgata shqiptare

Naim Hasani

Shqiptarët në Britaninë e Madhe po ndjekin me shqetësim, por edhe me shpresë, zhvillimet e fundit në Shqipëri me protestat e vazhdueshme te qytetarëve të Tiranës për prishjen e ndërtimteve nga qeveria dhe, së fundmi protestat e studentëve, të cilet po shtrihen në gjithë Shqipërine në një kohë kaq të shkurtër.

Të gjitha këto kërkesa kanë në themel një arsye fundamentale, atë të nëpërkëmbjes së dinjitetit dhe vjedhjes së shpresës për një të ardhme më të mirë, për çdo brez që jeton në Shqipëri, nga qeveria e “Rilindjes”, e cila po shkrin dhe shkatërron vendin çdo ditë e më shumë.

Thirrjet e studenteve “E duam Shqipërinë si gjithë Europa”, janë shprehje e qartë e dëshpërimit dhe shkatërrimit e nëpërkëmbjes së idenitetit të popullit nga një qeveri, që në themel ka skandalin, drogën dhe korrupsionin, si mënyra e vetme e sundimit dhe pasurimit për një oligarki që ka marre “peng” të ardhmen e shqiptarëve.

Mund të blesh dhe shesësh votën e qytetarëve, të sundosh me pushtetin e krimit dhe bandat kriminale, duke kanabizuar territorin dhe shoqërinë shqiptare. Mund të mashtrosh qytetarët për të ardhur në pushtet për 300,000 vende pune e të tjera bëma, dhe në vend të prespektivës Europiane, të jesh shkaktar i largimit masiv të rinisë dhe inteligjences shqiptare. Ky nuk ështe sukses, por dëshpërim dhe përbuzje.

Ora e ringritjes dhe zgjimit Kombëtar ndaj një errësire totale dhe diktatit “Rilindje” po vjen me shpejtësi.

Çdo iniciative për t'i zgjuar shqiptarët nga gjumi, duke filluar nga studentet, me një Dhjetor të dytë, pas 28 vitesh, duhet të përshëndetet nga çdo qytetar i ndershëm që ka në shpirt ëndrrën për një jetë më të mirë si gjithë Europa, duke shpresuar edhe njëherë te liria dhe demokracia.

Forca e popullit është uragani më i fuqishëm që mposht çdo bandë kanabizuese. Blerja e pushtetit me paratë e krimit dhe drogës nuk mund të prodhojë kurrë një qeveri ndryshe. Nëse një qytetar për çfarëdo arsyeje shet dhe blen votën, armen më të fuqishme në demokraci, ai duhet të ndjehet i turpëruar, kur provon nëpërkëmbjen e identitetit të tij, sepse është “shitur” në duart e “Rilindjes”.

Partia Demokratike e Shqipërisë dhe Lulzim Basha kanë paralajmëruar shqiptarët çdo ditë gjatë këtyre 5 viteve, me zë dhe me figurë, marrjen peng të Shqipërisë dhe Shqiptarëve, nga një grusht oligarkësh, që nuk ndalen në asgjë, derisa arrijnë të blejnë dhe tjetërsojnë vullnetin e qytetarëve nëpërmjet parave të krimit dhe pushtimin e shtetit dhe tempullit të demokracise, Parlamentin Shqiptar, nga elemente me precedentë të rrezikshëm kriminalë, duke i veshur me pushtet qeverisës dhe deputeti.

Kjo nuk mund të vazhdojë më dhe shqiptarët gjithmonë, në momentet më të vështira të historisë së tyre, kanë ditur të mbijetojnë. Miqte tanë në botën e qytetëruar mbështesin lirinë dhe demokracinë, e sundimin e ligjit në Shqipëri. Shqiptarët duhet ta kuptojnë njëherë e mirë se Shpresa e Shqipërisë janë vetë shqiptarët!

Mërgata shqiptare kudo që jeton, edhe këtu në Britani, është aksionere e drejtpërdrejtë e fateve të Shqipërisë.

Vendosja e konsolidimi i demokracisë dhe garantimi i votës së lirë, si në çdo shtet të Europës së qytetëruar që do të sillte në pushtet një qeveri të vërtetë Demokratike dhe të pakorruptuar, do të shihte edhe fundin e këtij shkatërrimi “Rilindas” dhe ringjalljen e shpresës se Shqipëria bëhet dhe se largimi nga trojet etnike do të frenohet, kur të respektohet e drejta qytetare për “Liri, Barazi dhe Demokraci”.

Zoti e bekoftë Shqipërinë dhe Shqiptarët!

*Autori është me profesion Avokat si dhe Kryetar i Degës së PD në Britani.