Regjisori Piro Milkani së bashku me familjen e tij, dhuron për të tretin vit radhazi, pemë për gjelbërimin e Parkut të Liqenit.
Këtë fundjavë, regjisorit Milkani iu bashkua edhe kryebashkiaku Erion Veliaj dhe Ambasadori i Republikës Çeke në Tiranë, Jaroslav Ludva, të cilët mbollën 100 pemë të reja.
“Jam shumë i lumtur që vijojmë sot aksionin e mbjelljes së pemëve me dy ambasadorë të Çekisë, ‘ambasadorin’ e përhershëm, mikun tonë të dashur, të madhin Piro Milkani, dhe ambasadorin çek të këtij mandati, dy miq të shtrenjtë, me të cilët na lidhi dashuria për qytetet. Jam i nderuar që jam në krah të të madhit Piro Milkani, i cili nuk ka humbur një vit dhe nuk ka marrë një vit mungesë kur vjen puna tek mbjellja e pemëve, dhënia e një kontributi për qytetin, tek largimi nga dhënia e opinioneve dhe e të bërit diçka konkrete”, tha Veliaj.
Ai ftoi qytetarët që t’i bashkohen kësaj nisme, për të dhënë një kontribut konkret për komunitetin ku jetojnë.
“Ka shumë njerëz që japin mend si duhen bërë gjërat, si duhet menaxhuar qyteti, por ka shumë pak njerëz që thonë: Unë do të jap një kontribut konkret. Të jam shumë mirënjohës dhe shpresoj shumë që shembullin e Piros, Margaritës dhe familjes së tyre të mrekullueshme, ta ndjekin të gjitha familjet e Tiranës. Asnjëri nuk është shumë i zënë për të mos u angazhuar një orë me mbjellje pemësh; nga ana tjetër, asnjëri nuk është shumë i vogël dhe i pafuqishëm për të mos bërë diçka të dobishme. Në vitin 2019, njeriu i vitit doli Greta Thunberg, një vajzë 16 vjeçe, e cila mobilizoi të gjithë të rinjtë për çështjet e mjedisit”, shtoi ai. Veliaj nënvizoi se motoja e këtij 100-vjetori të Tiranës Kryeqytet do të jetë çdo ditë mbjellja e 100 pemëve të reja, për t’i lënë diçka konkrete gjeneratave të ardhshme.
“Kemi vendosur një moto: çdo ditë të 100 vjetorit të Tiranës do të mbjellim nga 100 pemë, sa të na lejojë koha. Besoj do të kemi shumë familje, që një mënyrë për të përkujtuar të bërit të Tiranës Kryeqytet dhe një epiqendër të kulturës, artit, kinematografisë, por jo vetëm për Shqipërinë, por për gjithë shqiptarinë në rajonin tonë, të kemi një mundësi ta kremtojmë duke thënë: Lëmë diçka pas, që do jetë këtu edhe kur ndoshta mund të mos jemi në këto detyra, të mos kemi këto mundësi”, tha kryebashkiaku. Regjisori Piro Milkani tregoi sesi iu bashkua kësaj nisme dhe u shpreh krenar që Parku i Liqenit, por edhe Tirana, është më e bukur.
“Prej tre vitesh gjithmonë blejmë një bredh natyral sepse duam të jemi pranë natyrës. Një ditë gruaja më tha: “Gjynah, të ikt kot ky bredh”, dhe vendosëm pse mos t’ia dhurojmë parkut të qytetit, që këto vite është bërë vërtet shumë i bukur. Do e dhurojmë për Parkun sepse Tirana vërtet po gjelbërohet. Absolutisht i ndryshuar krahasuar me 10 vjet më parë: rrugët, parku i lojërave, çdo gjë është bërë me kulturë”, tha regjisori Milkani.
Ambasadori Jaroslav Ludva tha se përveçse ambasador i Republikës Çeke, ndihet edhe një qytetar i Tiranës, që ka dëshirë të ndihmojë.
“Tirana është një qytet shumë i bukur. Ky aktivitet është shumë i rëndësishëm për qytetarët e Tiranës. Unë jam ambasador i Republikës Çeke, por në të njëjtën kohë jam edhe qytetar i Tiranës, dua të ndihmoj dhe do të bashkëpunoj bashkë me Erionin. Dua të falenderoj Piro Milkanin, është vërtet ambasadori i përhershëm çek. Ka ndihmuar shumë herë, ka promovuar Republikën Çeke shumë dhe unë dua të bëj njësoj për Tiranën”, u shpreh ambasadori Ludva.
Financuar Nga Bashkimi Europian
