Vdekja e ish-kryeministrit të Kosovës, Basha: Rexhepi i shërbeu popullit si mjek për jetët e njerëzve

Kreu i Partisë Demokratike, Lulzim Basha i shpreh ngushëllimet familjarëve të ish-kryeministrit të Kosovës, Bajram Rexhepi i cili u nda nga jeta sot pas qëndrimit prej disa muajsh në koma.

Përmes një statsusi në rrjetin social “Facebook” Basha shkruan: “Pak njerëz i kanë shërbyer popullit të tyre si ai, duke u kujdesur me përkushtim si mjek për jetët e njerëzve, duke luftuar për lirinë e tyre dhe duke drejtuar përpjekjet e tyre për demokraci dhe përparim”.

Statusi i Bashës:

Bajram Rexhepi ishte njeri i veçantë dhe shqiptar i madh. Pak njerëz i kanë shërbyer popullit të tyre si ai, duke u kujdesur me përkushtim si mjek për jetët e njerëzve, duke luftuar për lirinë e tyre dhe duke drejtuar përpjekjet e tyre për demokraci dhe përparim.

Kam patur nderin të takohem shpeshherë me Bajramin dhe do të ruaj përherë brenda meje mbresat e pashlyera për dinjitetin, përunjësinë dhe mirësinë e tij.

Në këto momente të dhimbshme të ndarjes së tij të parakohshme nga jeta bashkoj lutjet e mia me ato të familjarëve dhe miqve të tij. U prehtë në paqe! I paharruar kujtimi i tij!