Veliaj: Tirana është transformuar në mënyrë të jashtëzakonshme, ka rritjen më të madhe ekonomike në rajon

Kreu i Bashkisë së Tiranës, Erion Veliaj thotë se Tirana ka pasur rritjen më të madhe ekonomike në të gjithë rajonin këto vite.

Gjatë fjalës së tij në punimet e Forumit “17 + 1” në nivel kryetarë bashkish, një nismë e Republikës Popullore të Kinës, Veliaj thotë se ky takim është edhe një mundësi fantastike për të rritur bashkëpunimin jo vetëm me Kinën, por edhe mes vendeve të rajonit.

“Ky është një qytet që është transformuar në mënyrë të jashtëzakonshme që nga koha e tranzicionit, në fillim të viteve’90, dhe në 30 vitet e fundit është qyteti që ndoshta ka pasur rritjen më të madhe ekonomike në të gjithë rajonin tonë, por ne jemi po ashtu të ndërgjegjshëm që vetëm nuk ia dalim dot. Ndaj shoh këtë si një mundësi fantastike jo vetëm për  rritur bashkëpunimin me Kinën, por edhe për të rritur bashkëpunimin me  njëri-tjetrin, Tiranës me Shkupin, Tiranës me Podgoricën, me Beogradin, Sarajevën, të Tiranës me qytete të tjera që ndoshta na mësojnë që nuk ia vlen të shpikim rrotën nëse diçka po funksionon perfekt në ato vende”, u shpreh kryebashkiaku.

Kreu i Bashkisë u shpreh se tashmë Tirana ka nisur një sërë procesesh dhe bashkëpunimi me kompanitë kineze, sikurse është ajo në fushën e transportit, ku shumë shpejt autobusët elektrikë do të jenë një realitet në vendin tonë.