Vera Bekteshi, Belina Budini dhe Sabri Hamiti marrin çmimin ‘At Zef Pllumi’ për vitin 2019. Në ceremoninë e zhvilluar në Qendrën Kulturore të qytetit të Lezhës treshja e letrave janë nderuar me çmimin që mban emrin e fratit të shquar, autor i veprës ‘Rno vetëm për me tregue’. Çmimi është rikthyer pas katër vitesh ndërprerje me mbështetjen e kryetarit të bashkisë së Lezhës, Pjerin Ndreu.
Vera Bekteshi është shpallur fituese për romanin-memuar ‘Vila me tri porta’, Belina Budini për studimin ‘Ndikuesit/Influencers’ ndërsa Sabri Hamiti për monografinë “At Zef Pllumi.
Juria e përbërë nga Jonila Godole, Rudolf Marku, At Viktor Demaj, Alfred Lela dhe Dedë Maluta kanë përzgjedhur këta tre autorë mes një morie që kanë dorëzuar krijimet në Bibliotekën e qytetit të Lezhës.
Sipas kryetarit të Bashkisë së Lezhës që i ka dorëzuar çmimin Sabri Hamitit, ceremonia ishte menduar të zhvillohej në dhjetor, muaji i lindjes së Zef Pllumit, por ka qenë emergjenca e shkaktuar nga tërmeti që ka çuar në shtyrje të datës.
I pranishëm në ceremoni ka qenë edhe ish-kryetari i bashkisë së Shëngjinit, Salvator Kaçaj i cili ka qenë mbështetës i çmimit për disa vite derisa reforma territoriale ‘e shkriu’ Shëngjinin duke e bashkuar me Lezhën.
Fitues të mëparshëm të çmimit ‘At Zef Pllumi’ janë Ismail Kadare, Bashkim Shehu, Bardhyl Londo, Dom Gjergj Meta e të tjerë.
