Video/Ishulli grek përmbytet nga stuhia, humbin jetën 5 persona

Greqi
Greqi

Ishullin grek Evia është goditur nga një stuhi ditën e djeshme, teksa dhjetëra fshatra janë përmbytur duke shkaktuar edhe viktima.

Mediat greke bëjnë me dije se stuhia e fuqishme ka vijuar edhe ditën e sotme, ndërsa raportohet që 5 persona kanë humbur jetën, përfshirë edhe një foshnje 8 muajshe.

Sipas informacioneve të fundit nga Zëvendësministri i Mbrojtjes Civile, Nikos Hardalia, i cili ndodhet në Vasilika të Evisë, kanë humbur jetën një 86-vjeçar dhe një 85-vjeçar. Të moshuarit u mbytën në shtëpitë e tyre.

Gjithashtu, ai theksoi se parashikimi meteorologjik fliste për 63 mm shi, ndërsa ra më shumë se 300 mm shi, duke rezultuar në këtë ngjarje të paparashikuar.

Në ishull po operon një brigadë e madhe zjarri  me 83 zjarrfikës, 31 automjete, 3 anije shpëtimi nga ekipi dhe një helikopter.

Raportohet se shërbimi kishte shpëtuar 35 persona të bllokuar, ndërsa thirrjet për pompimin e ujit nga shtëpitë kanë tejkaluar 140.

Në fshat duken tonelata me baltë që kanë mbuluar pothuajse gjithçka duke shkaktuar dëme të mëdha.