22 nëntori, dita ku u votua me referendum Kushtetuta e republikës është lakuar vazhdimisht nga presidenti Ilir Meta së fundmi, teksa ka folur për ngërçet e njëpasnjëshme jo vetëm në politikë, por edhe në Gjykatën Kushtetuese.
Disa javë më parë, gjatë një intervistë për RTV Ora, Meta njoftoi se më 22 nëntor do të bëjë publike nismën e tij mbrojtje të Kushtetutës.
“Më 22 nëntor do të bëj publike nismën time në mbrojtje të Kushtetutës, në mbrojtje të të drejtave themelore të qytetarëve shqiptar dhe kjo do të jetë një nismë mjaft e mirëmenduar dhe e mirorganizuar në mënyrë që të mos tolerojmë më në këtë vend, shkeljen dhe dhunimin sistematik të të drejtave kushtetuese të qytetarëve tanë”, tha presidenti.
I pyetur nëse kjo nismë do jetë si Presidenti i Republikës apo do t’i kthehet betejës politike, Meta u shpreh për një aksion që do të përfshijë të gjithë ato personalitete të së drejtës, të të drejtave të njeriut.
“Kjo është një nismë si President i Republikës, që e ka detyrim të kujdeset për të drejtat themelore të qytetarëve shqiptare, të mos pajtohet me asnjë institucion që i cenon ato. Gjithashtu të mos të pajtohet me gjithë institucionet që e kanë për të detyrë për t’i mbrojtur dhe nuk e bëjnë një gjë të tillë. Dhe do të jetë një nismë, ku shumë surpriza të tjera do të shpalosen në kohën e duhur.
22 nëntori do të jetë një aksion i vazhdueshëm që, nuk ka lidhje me partitë dhe forcat politike. Por që do të përfshijë gjithë ato personalitete të së drejtës, të të drejtave të njeriut që besojnë në demokraci, në rëndësinë e jashtëzakonshme, që ka respektimi i të drejtave të njeriut në këtë vend, të institucioneve të pavarura dhe që nuk konfirmohen dhe nuk pranojnë këtë situatë mjaft kritike në të cilën ndodhen sot të drejtat e njeriut në vendin tonë”, tha Meta.
Ndërkohë, mesditën e 22 nëntorit presidenti shkruan në rrjetet sociale se është koha për referendum të ri.
Sot është dita e Referendumit të tradhtuar. Koha për referendum të ri!, shkruan Meta.
Discussion about this post