BE pritet të publikojë gjatë kësaj jave “metodologjinë” e tij të re për zgjerimin.
“Qëllimi ynë nuk është të rikonceptojmë zgjerimin, por të forcojmë procesin,” i tha EUobserver një zëdhënës i komisionit.
Propozimet kishin për qëllim që “negociatat e pranimit të jenë më efektive, më të besueshme, të parashikueshme, objektive, politike dhe më dinamike”, shtoi zëdhënësi.
Ata gjithashtu ishin krijuar për të “marrë parasysh shqetësimet e ngritura nga disa nga vendet tona anëtare”, shtoi gjithashtu zëdhënësi.
Metoda e tanishme e zgjerimit e sheh BE-në të negociojë 35 “kapituj” ligjorë dhe politikë me secilin kandidat para se t’i mirëpresë ato si anëtarë të rinj dhe të zhbllokojë qasjen e plotë në fondet e BE-së dhe hartimin e politikave, në një proces që zgjat 5 deri në 10 vjet.
Por Franca, tetorin e kaluar, tha që kjo duhet të zbritet vetëm në shtatë hapa dhe se hyrja në fondet e BE-së duhet të zhbllokohet gradualisht gjatë rrugës.
Ai gjithashtu tha që përparimi duhet të jetë “i kthyeshëm” për kandidatët që nuk shënojnë progres me reformat.
Franca ka ‘ngrirë’ zgjerimin në Ballkanin Perëndimor derisa të ishte dakorduar një metodë e re, edhe pse Shqipëria dhe Maqedonia e Veriut kishin pritur të hapnin negociatat e pranimit gjatë 2019-ës.
“Ne gjithashtu duam t’i integrojmë partnerët tanë të Ballkanit Perëndimor, në një fazë të hershme, në politikat kryesore të BE-së si Marrëveshja e Gjelbër, infrastruktura dhe [politikat dixhitale”, “tha zëdhënësi i komisionit.
“Ne i kemi kërkuar të dy vendeve të bëjnë shumë, ata i plotësuan kriteret dhe … tani është radha jonë,” shtoi zëdhënësi.
“Ballkani Perëndimor është një përparësi për këtë komision dhe është në interesin tonë gjeostrategjik që t’i afrojmë partnerët tanë të Ballkanit Perëndimor sa më afër BE-së”, tha gjithashtu zëdhënësi.
“Presidenti francez gjithmonë thoshte se e ardhmja e Ballkanit Perëndimor ishte në Evropë – kjo kurrë nuk u vu në dyshim,” tha një diplomat i BE.
Dhe jo vetëm Franca, por edhe të tjerët si Danimarka dhe Holanda, nuk ishin të kënaqur zakonisht për zgjerimin, shtoi diplomati i BE.
Afati i Zagrebit
Nëse 27 komisionerët bien dakord për propozimet e reja, siç pritej, në mbledhjen e tyre të Martën (4 Shkurt), atëherë liderët e BE mund të jenë të gatshëm të miratojnë versionin përfundimtar të metodës së re në takimin e tyre në Bruksel në Mars.
Dhe kjo, nga ana tjetër, do të hapte rrugën për një samit më optimist të BE me liderët e Ballkanit Perëndimor në Zagreb në maj.
“Shpresojmë për një vendim pozitiv (mbi Shqipërinë dhe Maqedoninë e Veriut] shumë përpara samitit në Zagreb,” tha zëdhënësi i komisionit.
“Në përgatitje të takimit të Zagrebit, komisioni gjithashtu do të paraqesë një plan zhvillimi ekonomik për rajonin. Objektivi ynë është të intensifikojmë praninë tonë në Ballkanin Perëndimor dhe të ndihmojmë në mbylljen e hendekut të zhvillimit ekonomik midis nesh,” tha zëdhënësi.
Shqipëria, Bosnja, Kosova, Mali i Zi, Maqedonia e Veriut dhe Serbia dëshirojnë të anëtarësohen në BE, megjithë konkurrencën kineze dhe ruse për ndikim në rajon.
Turqia ishte në bisedime për t’u bashkuar, por këto u prishën katër vjet më parë, kur presidenti turk nisi një sulm brutal ndaj kundërshtarëve politikë.
Gjeorgjia, Moldavia dhe Ukraina gjithashtu duan të anëtarësohen, por BE po i mban ato në distancë, prej konflikteve të ngrira dhe aktive me forcat e mbështetur nga Rusia në territoret e tyre.
Financuar Nga Bashkimi Europian
