Një deklaratë e bërë nga drejtori i aeroportit të Anversës, Mercel Buelens, ka indinjuar komunitetin shqiptar në Belgjikë. Ai ndodhej në Bruksel, ndërsa e ka krahasuar stacionin e trentit Bruxelles – Midi me Kosovën.
“Kur ti mbërrin në Bruxelles – Midi, ai më shumë i ngjason Kosovës se sa një stacioni treni”.
Një krahasim i tillë u mor si një ofendim nga komuniteti i shqiptarëve të Kosovë dhe atyre të Shqipërisë.
Presidenti i Këshillit Evropian Kombëtar Shqiptar, Ramadan Gjanaj u ankua për këtë deklaratë raciste ndaj popullit shqiptar, ndërkohë që shtoi se pavarësisht se e kishte bërë mediatik problemin, trishtohet nga reagimi i vakët i figurave politike belge.
“Kjo ka të bëjë me deklaratat raciste dhe ksenofobe ndaj një populli, as bashkë me boshnjakët përjetoi krimet më të rënda kundër njerëzimit që Evropa ka njohur që pas luftës së dytë botërore. A e di Buelens që Kosova përjetoi vrasje, deportime dhe përdhunime dhe se 70% e territorit të saj u shkatërrua, e njerëzit u detyruan të linin shtëpitë e tyre nga Serbia? si mundet që një drejtor i një ndërmarrjeje publike të bëjë të tilla deklarata e të mos t’i tërhiqet vëmendja e të mos ketë reagim nga bota e politikës?”, tha Gjanaj për gazetën belge Bh.be
Komuniteti shqiptar në Belgjikë që është rreth 60 mijë persona, pret një falje publike nga Buelens, për racizmin e treguar.
Discussion about this post