“Ka qenë dhe është miku im”, si e mbronte Rama ish-zyrtarin e FBI, sot e mohon: S’ka lidhje me mua

Kryeministri Edi Rama e ka mohuar të ketë lidhje me akuzat që drejtësia amerikane ka ngritur ndaj ish-zyrtarit të lartë të FBI-së Charls McGonigal për përfitime të paligjshme dhe lidhje oligarkun rus Oleg Deripaska.

Në një reagim në rrjetet sociale ai nënvizon se s’ka asnjë provë që të vërtetojë përfshirjen e tij në këtë çështje, pasi nëse do të ekzistonin ato do t’i kishte nxjerrë hetimi i autoriteteve amerikane.

“Akuzohet në Amerikë një zyrtar i FBI për gjëra që s’kanë as edhe një lidhje me mua (se po të kishin do t’i kishte nxjerrë hetimi i atyre që nuk manipulojnë prova e as kursejnë fajtorë) dhe në Shqipëri fillon gjyqi ndaj meje në Big Brotherin e politikës, kanaleve e portaleve”, shkruan Rama sot ndër tw tjera.

Por çfarë deklaronte muaj më parë kryeministri Edi Rama në lidhje me Charles McGonigal?

Në një bashkëbisedim online me qytetarët, Rama e quajti McGonigal mikun e tij ndërsa tha se akuzat ndaj ish zyrtarit të FBI-së, nuk janë diçka që lidhen as me të si kreu i qeverisë dhe as me Shqipërinë.

“Shefi i Kundërterrorit i FBI-së ka qenë dhe është miku im nuk diskutohet. Nëse ai ka një çështje të tijën me drejtësinë në SHBA kjo është çështje e tij me drejtësinë atje. lëreni të flasë drejtësia në SHBA. Nuk bëhet drejtësia e nuk nxirren fajtorët e nuk bëhen akuzat në këtë farë feje se është e tmerrshme. Dhe nuk është e tmerrshme për mua sepse nuk kam asnjë problem dhe për sa kohë vijoj në këtë detyrë i kam marrë parasysh dhe pres më shumë se kaq, i pres të gjitha.

Por është e tmerrshme për këtë popull për këtë vend, për gjithë ato që ne i konsiderojmë vlera shqiptare e parime  e tradita. Çfarë të them më shumë se kaq. Bëhet fjalë për një çështje në SHBA që s’ka asnjë lidhje me mua, me qeverinë shqiptare, biznes të çfarëdollojshëm, me këtë teori i bie që ne nuk duhet të takojmë askënd sepse nesër dikush mund të ketë një problem me drejtësinë në vendin tij. Kjo është çmenduri”, deklaronte Rama.

Charls McGonigal akuzohet nder të tjera se ka marrë 225 mijë Dollarë nga një ish-punonës i shërbimeve sekrete të Shqipërisë dhe ka zhvilluar një sërë takimesh me biznesmenë dhe politikanë në Shqipëri, Kosovë dhe Bosnje, por pa i raportuar ato sipas rregullave amerikane.