“Do përfitojnë mbi 41 mijë biznese”, Këlliçi prezanton programin e taksave dhe tarifave

Belind Këlliçi ka prezantuar programin e tij për mbështetjen ndaj biznesit të vogël dhe të mesëm nëpërmjet reduktimit të taksave dhe tarifave.

Kandidati i koaliconit “Bashkë Fitojmë” pati një takim me përfaqësues të bizneseve dhe premtoi se nëse do të zgjidhjej si Kryeatar Bashkie, atëherë do të heqë taksën e përkohshme për infrastrukturën arsimore.

Këlliçi deklaroi se kjo taksë u ka marrë qytetarëve 42 milionë euro që prej vitit 2016, ku një pjesë e konsiderueshme ka përfunduar në xhepat e pushtetarëve.

Një tjetër premtim i tij ishte ulja me 50% e tarifës për pastrimin dhe gjerlbërimin.

"Nuk e kemi parë asnjëherë mbledhjen e këshillit bashkiakë, asnjë diskutim mbi hallet e qytetarëve apo bizneseve. Bizneset janë përballur me një rritje me 10 fish të taksave. Historia e këtyre 10 viteve ka qenë histori persekutimi për 54 mijë biznese në kryeqytet."

"Kjo kohë do marrë fund sepse deklaroj se biznesi i vogël dhe i mesëm do jenë prioriteti im si kryebashkiak i ardhshëm. Bashkarisht do reduktojmë taksat dhe tarifat vendore, jo vetëm se kredoja jonë si forcë politike është për taksa të ulëta. Tek unë do gjeni një aleat tejet i besuar." u shpreh Këlliçi.

TAKSAT 

Taksa e shumëpërfolur që është taksa e përkohshme e infrastrukturës arsimore.

"Me Belind Këlliçin si kryetar bashkie nesër, do bëhet zero. Është antikushteteuese. U proklamua si taksë e përkohshme.  U ka marrë qytetarëve tanë nga 1 janari i 2016-ës deri më siot, 42 mln euro."

"Me 42 mln euro pretendohet se janë bërë 17 shkolla. Në raport me çmimin dhe kostot e ndërtimit, s’ka logjikë racionale se si në BE të ndërtohet një shkollë me 600 mijë euro, ndërsa në Shqipëri me 2 mln euro. Gjykoj se pas 14 majit, kjo taksë do zërohet."

Taksa e tokës bujqësore do të bëhet zero për pjesën që i takon bashkisë.

Taksa e fjetjes në hotel do reduktohet me 30%.

Taksa e tabelës informuese do reduktohet me 30%.

Taksa e truallit do reduktohet me 30%

Taksa mbi ndërtesën do reduktohet me 30%.

TARIFAT

Tarifa e pastrimit dhe e gjelbërimit do reduktohet me 50%

Tarifa e zënies së hapësirës publike do reduktohet me 50%

"Janë mbi 41 mijë biznese të vogla dhe të mesme që do përfitojnë nga kjo paketë reduktimesh. Edhe bizneset e mëdha do përfitojnë."

"Ulja e taksave, do të rrisë në fund të ditës të hyrat në arkën e bashkisë, sepse taksat e ulëta bëjnë që bizneset t’i paguajnë ato. Bashkia e Tiranës ka buxhet afro 240 mln euro."