Xhaçka/ Spiropali thërriti Këshillin e Legjislacionit, reagon Bardhi: Urdhër anti-kushtetues!

Kreu i grupit parlamentar të PD-së, Gazment Bardhi ka reaguar pasi kryetarja e Kuvendit, Elisa Spiropali thërriti Këshillin e Legjislacionit, pas kërkesës së PD-së për seancë të jashtëzakonshme në Kuvend për të zbatuar vendimin e Kushtetueses për mandatin e deputetes Olta Xhaçka.

Bardhi shprehet se kryetarja e Kuvendit ka miratuar një urdhër anti-kushtetues, pasi sipas tij, ajo e ka detyrim kushtetues dhe ligjor të thërrasë sesionin e jashtëzakonshëm të Kuvendit breda 3 ditëve nga paraqitja e kërkesës së 1/5 së deputetëve.

Kreu i grupit parlamentar të PD-së shton më tej se zvarritja 2 vjeçare e kësaj çështje, mos zbatimi i dy vendimeve të Gjykatës Kushtetuese është mbrojtje politike nga drejtësia të një deputeti të mazhorancës, bashkëpunëtore e ngushtë e Edi Ramës.

Reagimi i plotë:

 “Kryetarja e Kuvendit ka detyrimin kushtetues dhe ligjor të thërrasë sesionin e jashtëzakonshëm të Kuvendit breda 3 ditëve nga paraqitja e kërkesës së 1/5 së deputetëve, për të zbatuar pa vonesa vendimin e Gjykatës Kushtetuese.

Mbledhje e Këshillit të Legjislacionit, përveçse zvarritje e panevojshme e procedurës për heqjen e mandatit të Olta Xhaçkës, është konsideruar edhe një procedurë antikushtetuese nga Gjykata Kushtetuese. Në paragrafin 61 të vendimit nr. 55/2024 të Gjykatës Kushtetuese theksohet se: “Gjykata vlerëson se Kuvendi nuk ka vepruar në përputhje me Kushtetutën për sa kohë çështjen e ekzekutimit të vendimit të saj ia ka nënshtruar vlerësimit të Këshillit për Legjislacionin dhe Këshillit për Mandatet, struktura në të cilat shumica parlamentare ka vënë në dyshim fuqinë detyruese të vendimit të Gjykatës, ka thirrur ekspert të jashtëm dhe, më pas, ka vlerësuar se çështja duhet t’i përcillet për votim seancës plenare”.

Zvarritja 2 vjeçare e kësaj çështje, mos zbatimi i dy vendimeve të Gjykatës Kushtetuese është mbrojtje politike nga drejtësia të një deputeti të mazhorancës, bashkëpunëtore e ngushtë e Edi Ramës. Është e papranueshme mbrojtja politike dhe pengimi ndaj drejtësisë që mazhoranca po bën për rastin e ish-ministres dhe deputetes Olta Xhaçka, duke injoruar Kushtetutën dhe duke penguar zbatimin e dy vendimeve të Gjykatës Kushtetuese.

Dënojmë me forcë standartin “një drejtësi për Edi Ramën dhe një drejtësi tjetër për gjithë të tjerët”.  Në çdo vend demokratik zbatimi i vendimeve të Gjykatës Kushtetuese është i detyrueshëm dhe themeli mbi të cilin ngrihet një shtet ligjor.”

Ditën e djeshme, gupi Parlamentar i Partisë Demokratike iu drejtua me një shkresë kryeparlamentares Elisa Spiropali, ku kërkon seancë të jashtëzakonshme në Kuvend, në lidhje me zbatimin e vendimit të Gjykatës Kushtetuese për mandatin e deputetes socialiste Olta Xhaçka. Kërkesa është firmosur nga kreu i grupit parlamentar të PD-së Gazment Bardhi dhe 28 deputetë të tjerë të PD-së dhe opozitës.

PD kërkon që t’i hiqet mandati ish-ministres Xhaçka për konflikt interesi, pasi bashkëshorti i saj, Artan Gaçi u shpall investitor strategjik me vendim të Këshillit të Ministrave, për të ndërtuar resortin “Dreamades Luxury Suites” në fshatin Gjilekë të Himarës.

Më konkretish, PD kërkon zbatimin e vendimit nr. 1, datë 23.01.2023 dhe nr. 55, datë 10.07.2024 të Gjykatës Kushtetuese dhe dërgimin po në këtë gjykatë të mocionit për papajtueshmërinë e mandatit të deputetes Olta Xhaçka.