Nga të dorëhequrit për të kandiduar si kryetar bashkie, tek zëvendësuesit në Kuvend, kush janë kandidatët?

Komisioni Qendror i Zgjedhjeve u ka dhënë mandatin këtë të enjte 4 deputetëve të rinj që do të futen në Kuvend.

Bëhet fjalë për Shkëlqim Bullarin nga radhët e Partisë Socialiste që do të zërë vendin e Besjan Ajazit, i cili kandidon për bashkinë e Gramshit.

Asllan Dogjani mori mandatin pasi Belind Këlliçi hoqi dorë për shkak të kandidaturës për bashkinë e Tiranës.

Lodovik Hasani do të pasojë Zef Hilën në Shkodër, kandidat i koalicionit “Bashkë Fitojmë”.

Ndërsa Qani Xhafa do të zërë karrigen e Luçiano Boçit, kandidat i koalicionit “Bashkë Fitojmë” për bashkinë e Elbasanit.

 Sa i përket Shkodrës, Frrok Gjini duhet të dorëzojë formularin e dekriminalizimit brenda 10 ditësh për të zërë vendin e Benet Becit. Nëse ai nuk e dorëzon, në radhë për të marrë mandatin është Kabir Fishta.

Lista

Luciano Boçi-Elbasan      PD           (Qani Xhafa)

Belind Këlliçi-Tiranë         PD            (Asllan Dogjani)

Zef Hila – Shkodër            PD          (Ludovik Hasani)

Benet Beci- Shkodër        PS     (Ilir Beqja refuzon, pas tij Frrok Gjini )

Besjan Ajazi- Gramsh       PS           (Shkëlqim Bullari)

Kush është Asllan Dogjani?

I lindur në Kukës më 15 nëntor 1967, Asllan Dogjani ka qen ish-deputet i Partise Socialiste, dhe tani deputet i Partise Demokratike në Kuvendin e Shqipërisë.

Dogjani ka kryer studimet në Akademinë e Rendit Publik, Tiranë, Shkollën e Gjuhëve të Huaja, Toronto, Kanada, dhe studimet për drejtësi në Fakultetin e Drejtësisë, Tiranë. Mban një master në drejtësi penale nga ky fakultet.

Ai ka punuar si specialist i Policisë Kriminale në Shkodër, në Forcat Renea, Inspektor dhe Shef i Policisë Kriminale në Komisariatin Nr. 4 në Tiranë, dhe Drejtor Policie për Qarqet Fier, Gjirokastër dhe Shkodër.

Asllan Dogjani ka mbajtur po ashtu postin e Shefit të Sektorit të Koordinimit të Territorit në Drejtorinë e Përgjithshme të Policisë.

Kush është Shkëlqim Bullari?

Shkëlqim Bullari i lindur në Cërrik dhe i diplomuar në Fakultetin Ekonomik të Qytetit të Elbasanit në degën Administrim Biznesi, ai kandidon në listën e Partisë Socialiste në Qarkun Elbasan.

 Pas kthimit nga emigrimi ai arriti që të ndërtojë një fermat më të mëdha Blegtorale në Shqipëri , gjithashtu edhe plantacionet më të mëdha arrore.

Kush është Lodovik Hasani?

Lodovik Hasani është një biznesmen i njohur nga Puka. Kryedemokrati Sali Berisha ka konfirmuar kandidimin e Zef Hilës për Vaun e Dejës, duke i siguruar një mandat Ludovik Hasanit.

Hasani ka gjetur përkrahje të gjerë në vendin e tij. Edhe pse nuk ka qenë pjesë e Kuvendit, ai e ka ngritur zërin për problematikat e Pukës.

“Do vazhdoj të jem një zë i fuqishëm i juaji, pavarësisht qënies sime jashtë Kuvendit të Shqipërisë.   Në vijim të këtij misioni, premtoj se do të jem gjithnjë dhe kurdoherë pranë jush, pasi vlerat dhe dinjitetin tuaj, nuk mundet askush t’i nëpërkmbë për qëllime të oligarkëve dhe të banditëve “ pa din e pa imam“  që vërtiten nëpër zonë si komitë duke njollosur imazhin e trevës sonë fisnike.

Do të jem i pranishëm herë pas here, në Pukë dhe në Fushë-Arrëz, për të dëgjuar dhë për të bashkëbiseduar intensivisht me ju për cdo problematikë, ndaj u ftoj të vijojmë këtë rrugë sëbashku, pasi unë, nuk do tërhiqem nga misioni për të qenë zëri juaj!”, shkruante në Facebook Hasani.

Kush është Qani Xhafa?

Qani Xhafa është ish-kreu i Komunës Labinot Mal. Xhafa kandidoi për PD-në në zgjedhjet e përgjithshme të vitit 2021 në qytetin e Elbasanit ku ishte i renditur i 8 në listë, pas Luçiano Boçit.

“Patjetër që do ta pranoj pasi është vullneti i qytetarëve të Elbasanit”, tha Xhafa për Politiko.al në nëntor të 2022 pasi Boçi vendosi që të lërë mandatin e deputetit të Partisë Demokratike, për të garuar për Bashkinë e Elbasanit.

Nga Boçi te Benet Beci/ Deputetët që sakrifikojnë mandatin për garën e bashkive

Mbështetjen që i dhanë qytetarët e Elbasanit, Boçi ka vendosur t’ua kthejë duke sakrifikuar mandatin e ligjvënësit dhe të garojë për të garuar për bashkinë.

“E marr këtë vendim sepse për mua rrugëtimi politik nuk është ngjitje në shkallët e karrierës partiake, por ngjitje në shkallët e përgjegjësisë ndaj qytetarëve. Dhe e konsideroj këtë vendim si një nga vendimet më të rëndësishme të jetës sime politike, por dhe asaj profesionale dhe pse jo të asaj jetës tokësore.

Ky kandidim i imi është përgjegjësi për t’u bashkuar të gjithë brenda PD, përgjegjësi për t’u bashkuar të gjithë si qytetarë e banorë të Elbasanit, të djathtë, gri e të majtë, për të ndërtuar dhe sjellë së bashku në Elbasan një shpresë të re, një besim të ri, pse jo një bashki të re që nuk është më e kryetarit dhe e drejtorëve, por e qytetarëve të saj”, tha Boçi.

Nënkryetari i Partisë Demokratike, Luçiano Boçi, nuk ishte i vetmi nga ligjvënëset që është treguar i gatshëm që të sakrifikojë mandatin e deputetit për të marrë përgjegjësinë për të garuar për pushtetin lokal.

Në kryeqytet kemi një tjetër figurë të rëndësishme në radhët e deputetëve të PD-së, i cili është shprehur i gatshëm të lërë mandatin e deputetit për të garuar për bashkinë e kryeqytetit Belind Këlliçi.

Ndërkohë, në Vaun e Dejës, deputeti demokrat i qarkut të Shkodrës, Zef Hila, ka dorëzuar aplikimin për në primare për t’u kërkuar votëbesimin demokratëve që të tentojë të kthejë pushtetin lokal në favor të të djathtëve.

Besjan Ajazi dhe Benet Beci që garojnë nën siglën e PS po ashtu dorëzuan mandatin.

Emri i Benet Becit si kandidat për zgjedhjet e 14 Majit u propozua nga Damian Gjiknuri më 28 shkurt të këtij viti.

Beci e mirëpriti këtë ofertë dhe la mandatin e tij si deputet, për t’u bërë pjesë e garës elektorale për Bashkinë e Shkodrës.

Beqaj refuzon mandatin e deputetit

Ish-ministri i Shëndetësisë Ilir Beqaj nuk e ka pranuar mandatin e Benet Becit si deputet i Partisë Socialiste në qarkun e Shkodrës.

Beqaj e ka dorëzuar përgjigjen e tij negative në Komisionin Qendror të Zgjedhjeve.