Xama: Veliaj i implikuar në shumë çështje të nxehta, inceneratori test për SPAK

Gazetarja Ola Xama deklaron se kryebashkiaku i Tiranës, Erion Veliaj i cili ka pranuar se është nën hetim pasuror, është një nga zyrtarët publik më të kallëzuar në SPAK.

Duke folur për “MCN Economy”, Xama deklaroi se ka dhjetëra kallëzime si nga partitë politike edhe nga qytetarë lidhur me konfliktet që kanë pasur me Bashkinë Tiranë si për shpronësimet edhe për prishjen e pallateve të vjetra.

Xama theksoi se ekspozimi më i madh i Veliajt, është në aferën e inceneratorit të Tiranës.

Po ashtu ajo përmendi edhe pasurinë e familjarëve të tij, bashkëshortes Ajola Xoxa dhe vëllait Arbër Veliaj.

Janë disa çështje të nxehta kur ka dhe implikimet e Veliajt, si inceneratori i Tiranës, shohim që hetimi i SPAK për Ahmetaj nxjerr në disa pasazhe veprimet që ka bërë kryebashkiaku Veliaj.

Kemi marrjen përsipër të angazhimit financiar, në faqen e dytë ka dhe dy kolona sa do të ishte financimi, por kryetari i bashkisë ka marrë përsipër kolonën për financimin që do bënte Bashkia Tiranë pa marrë vendim nga Këshilli Bashkiak.

Kanë anashkaluar kalimin e draft kontratës në Këshillin Bashkiak, këtu kemi një shkelje, në fazën e dhënies së koncensionit.

Problemi më i madh është te zbatimi i kësaj kontrate. Kemi 80 milionë euro deri më tani të paguara nga buxheti dhe 60 milionë euro të paguara nga tarifa e përpunimit të inerteve nga ndërtuesit për inceneratorin.

Gjithë këto para janë paguar dhe incenerator nuk kemi askund. Nuk ka monitorim të projektit ku në bazë të punimeve duhet të ishin bërë dhe pagesat.

Çdo vit autoriteti kontraktor ka qenë shumë i rregullt me pagesat. Kemi mosfunksionim të njësisë së monitorimit të projektit, nuk është bërë monitorimi.

Tjetër çështje e nxehtë është edhe “5D Construction”, aty kemi me masë sigurie tëre drejtorë të rëndësishëm të Bashkisë Tiranë.

Një tjetër skemë si “5D” po hetohet nga SPAK, edhe pse më e vogël në Agjencinë e Parqeve të Rekreacionit, që disa prej procedurave të tenderimit, ia kanë dhënë bashkëshortit të shefes së sektorit te APR dikur, apo “Tirana Parking” sot.

Çështja ku Veliaj del hapur dhe zbuluar, është fakti se janë paguar miliona euro për një incenerator që nuk ekziston.

Edhe pse janë të përfshirë dhe ish-ministri i Mjedisit dhe ish-sekretari i përgjithshëm i ministrisë Alqi Bllako, por fondet i ka dhënë Bashkia Tiranë.

Problemi më i madh i çdo bashkie janë mbetjet dhe të shohësh që sot nuk ka incenerator por një landfill ku janë ezauruar të gjitha kapacitetet dhe rrezikojmë një katastrofë mjedisore.

Është një tallje institucionale dhe me publikun që paguajmë për një gjë që nuk ekziston.

Edhe “5D” nuk mbetet mbrapa, sepse nëse më parë flisnim për tendera korruptiv sot flasim për tendera që një drejtor ia jep vetes së tij dhe kjo gjë nuk mund të bëhet pa dijeninë e drejtuesit të autoritetit kontraktor.

Nga ana tjetër Veliaj ka lënë qytetarët pa shtëpi, për t’iu dhënë leje oligarkëve. Ka disa denoncime sa i takon fondacioneve që drejton bashkëshortja e zotit Veliaj, Ajola Xoxa.

Po ashtu është ushtruar kontroll ndaj vëllait të zotit Veliaj, Arbër Veliaj. Mund të ketë dyshime për pagesat që janë bërë për kompaninë e vëllait të zotit Veliaj.

Ajo që dihet është se Arbër Hoxha është një biznesmen shumë i suksesshëm i kompanisë “Gogel”, të cilës i bleu 10% të aksioneve për 100 euro në vitin 2011 dhe më pas arriti t’ia blejë 100%.

Është një test për SPAK, jo emri i zotit Veliaj, por çështja e inceneratorit të Tiranës.

Ajo që shoh është se ka një stepje të SPAK për këtë çështje, dhe copëzim. 

Fillimisht u ndanë inceneratori i Tiranës, i Fierit dhe Elbasanit më vete.

Vetë inceneratori i Tiranës është copëzuar në disa fraksione të tjera. 

Por duhet të ishte një çështje e vetme, pasi përfituesit janë të njëjtët.

Fati politik i Erion Veliajt për mua është përfundimisht i mbyllur.

Nëse SPAK ka shkuar te bashkëshortja dhe vëllai i tij, tregon se është duke u hetuar.