Ndryshim sistemi dhe hapje listash, ndalim koalicionesh parazgjedhore dhe vendosjen e pragut 5% për hyrjen e partive në Kuvend.
Janë këto kërkesat e të ashtuquajturës opozita parlamentare që kanë ndeshur në kundërshtimin e ndërkombëtarëve, të cilët kanë kërkuar votimin e ndryshimeve në Kodin Zgjedhor për të cilat palët ranë dakord në marrëveshjen e firmosur me ndërmjetësimin e ndërkombëtarëve në rezidencën e SHBA-së në 5 qershor.
Fillimisht, ka reaguar OSBE, përmes përfaqësuesit në Shqipëri, këshilltarit për reformën zgjedhore, Florian Hobdari.
Ai tha se procesi për ndryshimin e sistemi zgjedhor duhet të nisë një vit përpara zgjedhjeve, çka për OSBE-në tashmë është vonë për të nisur diskutimet për këtë çështje.
“Nëse një shtet pjesëmarrës i OSBE-së vendos të ndryshojë sistemin zgjedhor, ne mund të ofrojmë mbështetje për procesin nëpërmjet të cilit kryen këto ndryshime. Ky proces, sipas të gjitha praktikave më të mira ndërkombëtare dhe të theksuara me forcë nga Këshilli i Evropës duhet të nisë të paktën një vit përpara zgjedhjeve të radhës dhe duhet të jetë gjithëpërfshirës dhe transparent”, është shprehur Hobdari në mbledhjen e përbashkët të Këshillit për Legjislacionin dhe Komisionit për Çështjet Ligjore.
Kjo deklaratë nuk i ka pëlqyer nismëtarit të propozimeve të reja, Myslim Murrizi, i cili i ka përmendur dy opinione të OSBE/ODIHR për Komisionin e Posaçëm për Reformën Zgjedhore.
“Në rekomandime theksohet që sistemi më i mirë për Shqipërinë është ai me lista të hapura, ku e bazoni ju deklaratën tuaj”, u shpreh Murrizi, deputeti që nuk pranoi të djegë mandatet në bllok me opozitën në fillim të 2019-ës.
PPE: Parlamenti të miratojë marrëveshjen e arritur në 5 qershor
Edhe zëdhënës i Partive Popullore Europiane, Michael Gahler përmes një deklarate ka kërkuar dje të miratohet marrëveshja për reformën zgjedhore e arritur më 5 qershor mes forcave kryesore politike.
Sipas tij, çdo përpjekje e partisë në pushtet për ndryshime të njëanshme të tjera shkon kundër konsensusit të arritur.
“Së bashku si Grupi i PPE në Parlamentin Evropian, urojmë partitë në Këshillin Politik Shqiptar, i cili pas Marrëveshjes së 5 Qershorit, ra dakord për paketën e reformës zgjedhore. Ne e lavdërojmë konsensusin e Partisë Socialiste në pushtet dhe Partinë Demokratike (anëtare e PPE) dhe presim miratimin e shpejtë zyrtar të kësaj pakete.
Çdo përpjekje e partisë në pushtet për ndryshime të njëanshme të tjera shkon kundër konsensusit të arritur.
Ky konsensus është kusht kyç për çeljen e negociatave për anëtarësim në BE.
Këshilli Evropian në Mars në të vërtetë kërkoi që Shqipëria të sqarojë ligjshmërinë e zgjedhjeve lokale të vitit 2019. Fakti që qeveritë lokale në Shqipëri drejtohen nga një parti e vetme, e cenon nocionin themelor të një demokracie pluraliste.
Këto janë tre nga 15 kushtet e rëndësishme që Shqipëria duhet të përmbushë përpara fillimit të negociatave për anëtarësim në BE.
Opinionet e fundit të Komisionit të Venecias për lirinë e mediave dhe gjyqësorit duhet të zbatohen plotësisht në mënyrë që të korrigjohen devijimet e mëparshme dhe të ecin përpara. Gjithashtu duhet të fillohet procesi penal lidhur me pretendimet e blerjes së votave në zgjedhjet e kaluara, përfshirë ato në Dosjet 184 dhe 339.
Të 15 Kushtet u vendosën në Mars nga Këshilli Evropian dhe u konfirmuan muajin e kaluar në Parlamentin Evropian nga një shumicë e madhe ndër-partiake.
Grupi Parlamentar i PEE vazhdon të mbështesë Shqipërinë në rrugën e saj drejt BE”, thuhet në deklaratën e zëdhënësit të PPE.
Nga ana tjetër, pavarësisht këtyre qëndrimeve, kryeministri Edi Rama, në fjalën e tij pas përfundimit të takimit të dytë me deputetët e opozitës parlamentare, ka lënë hapur mundësinë e një tryezë politike tre palshe, duke përfshirë në të edhe opozitën jashtëparlamentare.
Rama është shprehur se marrëveshja e arritur në tryezën e Këshillit Politik nuk mund të zhbëhet, për këtë arsye ekziston një konflikt në themel, që lidhet me marrëveshjen e bërë me opozitën jashtëparlamentare.
Financuar Nga Bashkimi Europian
