"Jo kundër muzikës, por kundër urrejtjes", media franceze pasqyron thirrjet për bojkot të Kanye West

Koncerti i reperit amerikan Kanye West në Shqipëri ka nxitur reagime të shumta, pasi qeveria shqiptare ka vendosur të akordojë rreth 4 milionë euro fonde publike për organizimin e tij, pavarësisht se artisti është ndaluar të performojë në shumicën e vendeve evropiane për shkak të deklaratave të tij antisemite.

Të enjten në mëngjes, artistë dhe aktivistë të skenës së pavarur kulturore protestuan përpara Ministrisë së Turizmit, duke mbajtur pankarta ku institucioni cilësohej si "Ministria e Turpit".

Ata kundërshtojnë vendimin për të përdorur afro 4 milionë euro nga fondi rezervë i shtetit për financimin e koncertit të Kanye West, i planifikuar të mbahet të shtunën, më 11 korrik, në një stadium të përkohshëm të ndërtuar pranë Tiranës.

Sipas Courrier des Balkans, shkruan politiko.al, mbështetja financiare publike u shpall të hënën me argumentin se ishte e nevojshme për të "shpëtuar koncertin", megjithëse aktiviteti ishte prezantuar fillimisht si një nismë private.

Artikulli kujton se Kanye West është i njohur për deklaratat e tij antisemite dhe islamofobe, se nuk e ka fshehur admirimin për Adolf Hitlerin dhe se është i ndaluar të performojë në shumicën e vendeve evropiane.

"Për një koncert që shërben si marketing politik për kryeministrin, hidhen më shumë se 4 milionë euro nga buxheti i shtetit vetëm për të mbushur stadiumin për një shfaqje të vetme, ndërkohë që e gjithë skena e pavarur kulturore shqiptare, me qindra artistë dhe profesionistë, mezi siguron 500 mijë euro për të gjithë vitin në mbarë vendin. Turp!", citohet reagimi i artistëve protestues.

Sipas Courrier des Balkans, kjo revoltë pasqyron ndjenjën e braktisjes që përjetojnë shumë artistë vendas në një vend ku buxheti për kulturën përfaqëson vetëm rreth 0.1% të Prodhimit të Brendshëm Bruto dhe ku institucionet kulturore përballen me vështirësi të mëdha.

Rama: Koncerti shmang një "turp kombëtar"
Artikulli thekson se kryeministri Edi Rama mbrojti këtë shpenzim, duke deklaruar se ai synon të shmangë një "turp kombëtar" dhe se koncerti pritet të sjellë të paktën 100 milionë euro përfitime ekonomike.

Megjithatë, sipas autorit, kjo shifër duket pak e besueshme dhe nuk i bind protestuesit, të cilët e shohin vendimin si një tjetër simbol të një qeverie që favorizon spektaklin në kurriz të kulturës shqiptare.

Artikulli sjell edhe reagimin e ish-zëvendëskryeministrit Genc Pollo, i cili ka kritikuar ashpër financimin.

"Edi Rama subvencionon me 4.3 milionë euro një artist të njohur për thirrjet e tij pro-naziste dhe antisemite, ndërkohë që prej muajsh qeveria siguronte se nuk do të përdorej asnjë qindarkë nga fondet publike. Me një buxhet vjetor të kulturës prej vetëm 21 milionë eurosh, pse duhet që taksapaguesit shqiptarë të shpëtojnë një aktivitet privat? Rama e përdor paranë publike si arkën e tij personale", citohet Pollo.

Thirrje për bojkot
Artikulli përmend edhe reagimin e analistit politik Adri Nurellari, i cili u ka bërë thirrje qytetarëve të bojkotojnë koncertin.

"Kjo nuk është kundër muzikës apo lirisë artistike, por kundër normalizimit të gjuhës së urrejtjes dhe antisemitizmit. Ironia është se e njëjta qeveri që i quan protestuesit e Revolucionit të Flamingove Rozë 'antisemitë', po hap dyert e Shqipërisë për një artist që është bërë simbol botëror i antisemitizmit me deklaratat e tij", citohet ai.

"Lufta hibride" dhe kontradikta politike
Sipas Courrier des Balkans, debati rreth koncertit tashmë shkon përtej çështjes financiare apo kulturore.

Artikulli ngre pyetjen se si Edi Rama, i cili është paraqitur prej vitesh si një nga mbështetësit më të fortë të Izraelit në Evropë  duke mbajtur edhe fjalim në Knesset  dhe që ka akuzuar protestuesit e "Flamingove Rozë" se manipulohen nga Irani për shkak të aleancës së Shqipërisë me Izraelin, mund të presë dhe financojë me para publike një artist të njohur për deklaratat e tij antisemite, pro-naziste dhe kundër Izraelit.

Artikulli shpjegon se protestat, të cilat nisën si një reagim qytetar kundër projekteve të diskutueshme të zhvillimit imobiliar, kanë marrë tashmë një dimension gjeopolitik.

Sipas autorit, kryeministri Rama ka akuzuar Iranin se po zhvillon një "luftë hibride" dezinformimi për të destabilizuar Shqipërinë, duke pretenduar se aktorë të huaj dhe grupe të mbështetura nga Teherani po përhapin pretendimin se projektet në fjalë synojnë vendosjen e palestinezëve nga Gaza në territorin shqiptar.

Nga ana tjetër, protestuesit, të cilët gjatë demonstratave në Tiranë mbajnë flamingo rozë gjigante të fryra me ajër, i hedhin poshtë këto akuza dhe i konsiderojnë ato një përpjekje për të shmangur vëmendjen nga problemet reale.

Për ta, protesta është një lëvizje legjitime kundër korrupsionit, privilegjeve që u jepen investitorëve të huaj dhe shkatërrimit të mjedisit.

Artikulli përfundon se, mes polemikave për financimin e koncertit dhe një krize që po merr përmasa ndërkombëtare, Edi Rama ndodhet tashmë nën presion në disa fronte njëkohësisht.