Ka qenë një ditë e nxehtë me zhvillime ‘të nxehta’ sot për qytetin e Shkodrës.
Këshilli i ri Bashkiak është konstituuar mes tensionesh dhe protestash nga mbështetës të PD dhe qytetarë të shumtë.
Këta të fundit nisën të protestonin me pankartat ‘Rama ik’ dhe thirrjet kundër qeverisë që prej orës 10.00 para prefekturës, së drejtuar prej Çesk Milljes, i cili thirri mbledhjen e parë për zyrtarizimin e këshillit.
Por kundërshtimi nga ana e PD nisi jo vetëm për shkak të konsiderimit si jolegjitime, por edhe prej vendit ku u zgjodh fillimisht të mbahet takimi, rektorati i universitetit ‘Luigj Gurakuqi’.
PD e cilësoi provokim për shkak se ky ambient simbolizon lirinë dhe rezistencën e shkodranëve, duke sjellë në vëmendje ngjarjen e 2 prillit 1991, ku mbetën të varë 4 dëshmorë.
Sot, në minutat e fundit para mbledhjes, vendi u zhvendos te Biblioteka e universitetit, ndërsa ra në sy një prani e shtuar e vënë në dispozicion e forcave të policisë së rendit, Shqiponja dhe FNSH.
Në orën 11.00 nisi mbledhja për konstituimin e Këshillit Bashkiak të dalë prej 30 qershorit. Për rreth dy orë, ajo u shoqërua në thuajse çdo moment me tension dhe përplasje me forcat e policisë.
Turma tentoi të hyjë brenda bibliotekës, por tentativa e tyre dështoi pasi pati vazhdimisht rezistencën e policisë e vendosur para portës së godinës. Po ashtu, nuk munguan as thirrjet kundër qeverisë dhe kryeministrit Edi Rama.
Tension brenda mbledhjes
Megjithëse të rrethuar në të katër anët me policë, tensionet nuk munguan edhe brenda mbledhjes.
Ishte kryetarja e Këshillit të Qarkut Shkodër, Greta Bardeli, ajo e cila e cilësoi nul mbledhjen e Këshillit Bashkiak dhe vendimet që ky Këshill do të merrte. Bardeli e mbajti këtë qëndrim në sallën e mbledhjes, duke e cilësuar atë si një akt antikushtetues.
Përpara se të braktiste mbledhjen , Bardeli deklaroi se anëtarët e të ashtuquajturit Këshill po konsumojnë disa vepra penale, pasi po tentojnë të ngrenë institucionet pa zgjedhje dhe në kundërshtim me dekretin e Presidentit të Republikës.
Kryetarja e re e Këshillit Bashkiak
Me 42 vota pro Brisela Kadia u zgjodh kryetare e Këshillit Bashkiak të Shkodrës.
Po ashtu, nën drejtimin e saj u zgjidhën edhe 3 nënkryetarë: Arvid Osja, Tereze Brigja dhe Suada Selimaj.
Gjatë fjalës së saj, Kadia tha se do të jetë e drejtë dhe e paanshme. Ajo foli edhe për Valdrin Pjetrin, i cili pak ditë më parë dha dorëheqjen nga marrja e mandatit.
“Pjetri nuk merr mandatin, kështu që procedurat për zgjedhjen e kryetarit të ri do të vijojnë sipas Kodit të ri zgjedhor”, tha Kadia.
Tom Doshi provokon protestuesit, shishe kokës gjatë largimit
Ishte deputeti Tom Doshi, i pari që doli nga mbledhja përballë protestuesve të PD, ndërsa shkaktoi revoltim te këta të fundit.
Protestuesit e kanë ndjekur në këmbë deputetin Doshi, deri te tregu i këmbimit valutor, shoqëruar me thirrje kundër tij dhe qeverisë Rama.
Po ashtu, gjatë ndjekjes në këmbë mësohet se ai është qëlluar edhe me shishe uji në shenjë proteste, ashtu si edhe disa këshilltarë të tjerë të rinj. Po ashtu, mes protestuesve pati edhe përplasje fizike me policinë.
Në një prononcim të shkurtër për mediat, Doshi tha se ishte pjesë e mbledhjes si aleat i PS.
“Mora pjesë në mbledhjen e Këshillit si aleat i PS, për të tjera vendimet i merr Edi Rama”, thaq Doshi, ndërsa lidhur me protestën ai tha: Kur nuk morën pjesë në zgjedhje, s’kanë pse protestojnë sot”.
Ademi: Do vazhdoj të jem në krye të Bashkisë Shkodër
Në një dalje publike, kryetarja aktuale e Bashkisë së Shkodrës, Voltana Ademi, duke falënderuar qytetarët shkodranë për shembullin që dhanë me rezistencën e tyre, tha se do të vazhdojë të jetë kryebashkiake e Shkodrës.
Ajo u shpreh se votimet e 30 qershorit janë një farsë që do të zhbëhen, ashtu siç, sipas saj, do të zhbëhet ajo që ndodhi sot në Shkodër.
“Qyteti dhe Bashkia e Shkodrës u përkasin shkodranëve dhe askujt tjetër. Jam e emocionuar që qytetarët e Shkodrës i kanë dhënë shembullin më të mirë gjithë Shqipërisë. Votimet e 30 qershorit, një farsë për Shkodrën dhe gjithë Shqipërinë do të zhbëhen. Këtë e thonë qytetarët, shqiptarët, e thonë zonjat dhe zotërinjtë e Shkodrës. Askush nuk mund të dalë mbi vullnetin e njerëzve. Ajo që ka ndodhur sot në Shkodër do të zhbëhet. Ne do të vazhdojmë të gjithë bashkë ta duam dhe ta mbrojmë qytetin. Unë do të kem detyrën dhe përgjegjësinë nga ana tjetër që të jem kryebashiake e Shkodrës deri në momentin kur ne shqiptarët në Shkodër të sigurojmë zgjedhje të vërteta, ku të gjithë mund të zgjedhim të lirë”, u shpreh Ademi.
Ajo theksoi se ajo që ndodhi në Shkodër ditën e sotme ishte një demonstrim i së vërtetës për të gjithë ata që kanë veshë për të dëgjuar të vërtetën e dhimbshme të shqiptarëve që, sipas saj, nuk do të lodhen kurrë së kërkuari të drejtën.
“Nuk mundet askush të vendosë në emër të shkodranëve dhe shqiptarëve”, tha Ademi në mbyllje të fjalës së saj.
Konstituimi i Këshillit Bashkiak ishte planifikuar që të mbahej në datën 21 gusht, një ditë pasi i përfundon me ligj mandati i kryetares aktuale, Voltana Ademi. Por Partia Socialiste e afroi me dy ditë datën e konstituimit, vendim i cili erdhi pas tërheqjes nga marrja e detyrës të kandidatit fitues, Valdrin Pjetri.
Ky i fundit, rezultoi se kishte qenë i dënuar në Itali me burg për drogë në vitin 2003, por nuk e kishte deklaruar në formularin e vetëdeklarimit. PD-ja publikoi dokumentet që vërtetonin vendimin e autoriteteve italiane, teksa fshehjen e dënimit, kreu i qeverisë e ka konsideruar një akt të patolerueshëm dhe njoftoi se deri sa të zbardhet e vërteta ligjore, PS dhe Pjetri i kanë rrugët e ndara.
