I ftuar në studion e Adi Krastës ish-ministri i drejtësisë Ylli Manjani, ka folur për situatën politike në të cilën ndodhet vendi, si dhe arsyet e vërteta të largimit të tij nga posti që mbante.
Mungesën e emrit të tij në listat e kandidatëve ai e ka parë si një vendim të partisë së tij, megjithatë nuk e ka fshehur dëshirën e të qenurit pjesë.
“Mua nuk më ka bërë dëm partia, ky është vendim i partisë, nëse partia nuk e sheh të arsyeshme që të fusë ministrin e saj në listë ky është vendim i saj. Mendoj se mund të kisha kontribuar, nuk jam kundër të rinjve. Konspiracioni është prezent dhe nëse nuk mëson rregullat e tij nuk mbijeton. Është e pamundur të bjë një kompromis për çfarë? Për të qenë anëtar i parlamentit? “-ka thënë ai.
Për sa i përket vendimit për largimin e tij nga posti i ministrit të drejtësisë Manjani e sheh si një kundërveprim të kryeministrit ndaj daljeve të tij në publik për të bërë të dukshme problematikat në lidhje me sektorin që ai drejtonte.
Rama është politikan i sukseshëm por kryeministri Rama ka defekte serioze sipas Manjanit.
“Diskutimi për kryeministrin është detyrë sepse është njeriu që drejton. Rama është politikan i sukseshëm por kryeministri Rama ka defekte serioze. Nëse diskutojmë pas 27 vitesh lirinë e shprehjes duket kthim prapa. Marrëdhënia e kryeministrit me të tjerët është e frikshme. Kur mendoja që para pak ditësh nuk do të shkonim në zgjedhje sepse kishte vendosur të mos dialogonte është e frikshme. Rama ka shkatërruar konstitucionalizmin. Kushtetuta nuk është ta zbatosh kur të intereson por pikërisht kur nuk të intereson.”-tha Manjani
Financuar Nga Bashkimi Europian
