Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Ngjarjet botërore që formësuan vitin 2018-të

Politiko 31 Dhjetor 2018, 15:00

Viti 2018-të u shoqërua me ngjarje të rëndësishme, të cilat ndryshuan, ku më pak e ku më shumë, botën.

Duke u nisur nga lëvizjet, triumfet, skandalet, takimet, dorëheqjet e deri tek humbjet e mëdha, Politiko.al sjell një vështrim të ngjarjeve që morën vëmendjen tonë gjatë gjithë vitit.

Këto janë 10 ngjarjet më të rëndësishme që dhanë jehonë në vitin 2018:

Fushata "Me too"

Fushata "Me Too" u krijua si lëvizje kundër ngacmimit seksual dhe sulmeve seksuale ndaj vajzave dhe grave. Ajo u përhap zyrtarisht në tetor 2017 si një hashtag në mediat sociale, në përpjekje për të demonstruar përhapjen e ngacmimeve seksuale, veçanërisht në vendin e punës. Fushata në median sociale vjen pas skandalit të ngacmimeve dhe sulmeve seksuale të producentit të Hollivudit, Harvey Weinstein. Kjo fushatë u bë shumë masive dhe viti 2018 u quajt “Viti i Gruas” në SHBA.

Çështja "Skriptal"

Më 4 mars 2018, Sergei Skripal, një ish-oficer ushtarak rus dhe agjent i dyfishtë për shërbimet e inteligjencës së Mbretërisë së Bashkuar dhe vajza e tij Julia Skripal u helmuan në Salisbury të Anglisë, me gaz nervor, ku mbeten në spital në gjendje kritike. Më shumë se 100 diplomatë rusë u dëbuan nga mbi 20 vende si pjesë e reagimit të koordinuar nga SHBA dhe BE.

Zgjedhjet në Itali

Më 4 mars 2018, u zhvilluan zgjedhjet në Itali, ku surprizë ishte triumfi i Lëvizjes “5 yjet” dhe Lega Nord, duke shënuar kështu një humbje të madhe për Partinë Demokratike. Partitë Lëvizja "5 yjet" dhe "Lega Nord" zgjodhën si kryeministër të Italisë, Giuseppe Conte-n.

Kim Jong Un kalon kufirin në Korenë e Jugut

Më 17 prill 2018, ndodhi ngjarja historike ku Kim Jong Un, u bë udhëheqësi i parë i Koresë së Veriut që shkeli në territorin e Koresë së Jugut që nga viti 1953. Presidenti i Koresë së Jugut Munin Jae-in ishte duke e pritur për ta përshëndetur atë në vijën e demarkacionit ushtarak që ka ndarë prej kohësh dy Koretë.

Takimi i Trump me Kim Jong Un

Më 12 qershor 2018, Presidenti i SHBA Donald Trump takohet me udhëheqësin e Koresë së Veriut, Kim Jong-un në Singapor. Takimi i tyre i parë zgjati 45 minuta dhe nisi me një shtrëngim të gjatë duarsh. Trump, tha se bisedimet për çarmatosjen e Gadishullit Korean nga armët bërthamore, do të jenë një “sukses i jashtëzakonshëm”. Ndërkohë, Kim u shpreh para mediave se "në të kaluarën, praktikat e vjetra dhe paragjykimet punuan kundër nesh dhe vendosën shumë pengesa në rrugën tonë, por i mposhtëm të gjitha dhe ja ku jemi sot”.

Kupa e Botës

Kompeticioni më i madh futbollistik, "Kupa e Botës", këtë vit u fitua nga Franca, e cila mundi në finalen e madhe Kroacinë me rezultatin 4-2, më 15 korrik 2018, të zhvilluar në Rusi. Ky event ka pasur një audiencë të kombinuar globale prej 1.12 miliardë shikuesish. Hapja e ceremonisë së natës finale u realizua nën ritmet e këngës "Live it up" nga këngëtarja shqiptare Era Istrefi, aktori Will Smith dhe këngëtari Nicky Jam.

Vdekja e George H.W. Bush

Më 30 nëntor 2018, ish-presidenti i SHBA-së George H.W. Bush ndahet nga jeta në moshën 94-vjeçare. Ai ishte presidenti i 41-të i SHBA midis 1989 dhe 1993, pasi shërbeu dy mandate si zv.president, nën presidencën e Ronald Reagan. Në prill, ai u shtrua në një njësi spitalore të kujdesit intensiv për shkak të një infeksioni, një javë pas vdekjes së gruas së tij Barbara.

Dorëheqja e Merkel nga partia

Më 7 dhjetor 2018, kancelarja gjermane Angela Merkel, largohet nga posti i kryetares së partisë kristiandemokrate CDU, pas 18 vitesh drejtimi në krye të saj. Fjalimi i saj 35-minutësh u shoqërua me duartokitje e lot, ndërkohë që ajo theksoi se ka ardhur koha “për një kapitull të ri”.

Krijimi i Ushtrisë së Kosovës

Më 14 dhjetor 2018, krijohet ushtria e Kosovës, pa miratimin e NATO-s, që ka paralajmëruar se do ta rishohë këtë vendim. Legjislacioni për transformimin e Forcës së Sigurisë së Kosovës në të armatosur, e krijuar kryesisht për reagimin ndaj krizave, mbrojtjes civile dhe heqjen e artilerive nga konflikti i viteve 1990 në ushtri, u miratua nga 105 deputetë në Kuvend.

Tërheqja e SHBA nga Siria

19 dhjetor 2018, Shtëpia e Bardhë konfirmoi nisjen e tërheqjes së trupave amerikanë nga Siria, vetëm pak pasi presidenti Donald Trump deklaroi se grupi i Shtetit Islamik ishte “mposhtur”. Rreth 2.000 trupa ndihmuan rimarrjen e një pjese të konsiderueshme të verilindjes së Sirisë nga Shteti Islamik.