Listat e PD, ç’do të bëjnë “ngelësit’ dhe çfarë Basha me forumet

Alfred Lela

Një pjesë e grupit parlamentar të PD është lënë jashtë listave të 25 prillit nga pesëshja e selektorëve, gjë ka krijuar befasi; të pakëndshme për disa e të përligjura për të tjerë. Ka, sigurisht, subjektivizëm në këtë vendim, si në çdo tjetër, por mund të thuhet me siguri se lista e të përjashtuarve thotë diçka për procesin.

Në këtë rast se po funksionon, nuk është i stisur, dhe se gjendet jashtë duarve të kryetarit Basha. Ky perceptim i bën nder, në radhë të parë Partisë Demokratke, së dyti kryetarit të saj dhe sidomos pesëshes së përzgjedhësve Mustafaj, Marku, Ruli, Nishani, Papa.

Të pakënaqurit apo të ‘lënët jashtë’, sigurisht, nuk do bien dakord me sa më sipër, por në çdo përzgjedhje dhe proces ka dhe do të ketë gjithmonë të pakënaqur. E rëndësishme është që procesi të jetë i drejtë, dhe jo i mirë. Politika dhe hierarkia nuk janë të tipologjisë ‘let’s play nice’.

Ajo që mbetet për t’u bërë tani nga forumet e PD është pikërisht ruajtja e linjës të ‘së drejtës’, përkundër asaj të 'së mirës'. Ka filluar të ndihet që tani marrja e një linje ngushëlluese për ‘të skualifikuarit’, duke përdorur eufemizmin ‘u shtyhet miratimi për fazën tjetër’. Kjo dykuptimësi, e cila thotë se të gjithë janë fitues, askush nuk del i humbur, etj., është një torbë broçkullash për kalamaj. Një prej shenjave që duhet të jape, PD si edhe ‘të pakënaqurit’, është pjekuria. Pjesë e kësaj është, detyrimisht, njohja, si nga forumet partiake ashtu dhe nga të mbeturit jashtë listës së 25 prillit, të vendimmarrjes dhe statusit të pesëshes selektore.

Ish-deputetë kanë dalë këto ditë në media duke e vënë në diskutim pesëshen dhe duke folur për agjenda personale, dhe se vendimet i marrin forumet. Në këtë rast, jo. Forumet vetëm sa do të certifikojnë vendimet e selektorëve. E vetmja dritare për ta është që z. Basha të mos ‘e njohë’ njësinë përzgjedhëse që thirri vetë dhe ‘të fusë nga dritaret’ e 20 përqindëshit ata që u lanë jashtë dyerve nga pesëshja e miratuar po prej tij.

Si çdo thikë me dy presa kjo do të gjakosë në anën e kundërt duke e delegjitimuar, si procesin ashtu dhe kryetarin e partisë.

Ka edhe një detaj tjetër që i bën nul përpushjet ankimtare të të ‘përjashtuarve’. Ata janë gjendur në listat fituese të partisë në zgjedhjet e shkuara si pasojë e një procesi arbitrar të kryetarit Basha, i cili shpërfilli forumet dhe zgjodhi ata. Nuk është rezultati katastrofik, dhe as besimi i Bashës, që duhet t’i mbajë nën zapin e durimit, por fakti se këtë radhë përzgjedhjet bëhen me procedurë dhe proces. Kundërvënia do të dëshmojë se ata, më shumë se partinë si komunitet të së përbashkëtës dhe ideve kanë hallin e karrierave të veta. Nëse shumë prej tyre nuk e kanë sqimën për ta dalluar këtë hollësi, shumë prej atyre që janë jashtë gardhit e kanë dhe do ta shprehin këtë paradoks.

Për të mos përmendur diçka tjetër: faktin se ata kanë nënshkruar deklarata ‘bese’ ku pranojnë se i nënshtrohen procesit partiak dhe se nuk do të dalin kundër vendimeve dhe përfundimeve të tij. Është koha për ta që të kujtojnë të larguarit e vitit 2017, Topallin, Patozin e të tjerë, të cilët i këshillonin, studio më studio e status më status, se jeta dhe kontributi në parti nuk është domosdoshmërisht ulësja në parlament apo qeveri.

Eshtë rasti i tyre për ta zbatuar këtë këshillë. Përndryshe i pret gjykimi si hipokritë (apo sharlatanë).

Ç’ka ndodhur është, sigurisht, një pengesë për karrierën e tyre individuale, por nuk duhet lexuar si humbje e PD. Akti i tyre i vetëm është që të mbështeten po te PD për ringritjen. E kundërta, një thes me miza dhe një seri me vickla e rrit pengesën dhe thellon hendekun.

Edhe mund të besojnë të shprehja popullore ‘qesh mirë kush qesh i fundit’, dhe të presin vendin e një ministri në qeverinë (hipotetike) Basha, por edhe këtu kanë një pengesë. Nëse Basha është KM i ardhshëm, do ta ketë të vështirë të ndërtojë kabinet me ‘të refuzuarit’ e listave për deputetë.

Le të themi se ‘të shtyrëve për më vonë’, u është dhënë një periudhë ngrirjeje dhe reflektimi e cila nuk është as parajsë dhe as ferr, por i ngjan më shumë purgatorit. Prej asaj qendre të pezullisë është në dorën e tyre të marrin në secilin drejtim.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm