Flash News

Ceno Klosi me mbi 800 vota të vjedhura, Balluku gjen si arsye lodhjen e numëruesve

"Fast & Furious" në ish-Bllok, policia ndjek një Audi Q8, përplasen 4 makina

Makina përplas dy turistë me motoçikletë në Fushë Arrëz, humb jetën njëri prej tyre

Aksident i rëndë në Thumanë, një i vdekur, 3 të plagosur

Gjykata e Durrësit pezullon nga detyra drejtorin e Arsimit Parauniversitar

KRYESORE

Që nga 9 marsi, si ka ndryshuar situata nga Covid-19 për një muaj në Shqipëri; akuzat që shoqëruan pandeminë

Politiko 9 Prill 2020, 12:31

Mesnatën e 9 marsit, Shqipëria u rendit zyrtarisht mes vendeve të prekura nga Covid-19.

Dita-ditës, rastet u shtuan dhe sot më 9 prill, pra një muaj më pas, numërohen zyrtarisht 409 persona të infektuar në rang vendi.

Por, si ka ndryshuar situata një muaj pas konfirmimit të dy rasteve të para, babë e bir banues në Tiranë?

Sipas të dhënave zyrtare nga Ministria e Shëndetësisë, sot vendi ynë numëron 409 raste të konfirmuara me coronavirusin e ri dhe 22 viktima.

Po ashtu, janë shëruar 165 persona deri tani, ndërsa janë testuar 3223 raste të dyshuara.

Mes personave të prekur janë përfshirë jo vetëm qytetarë, por edhe mjekë dhe infermierë, të ndodhur në “vijën e parë të zjarrit”, ndër to mund të përmendim kreun e Urgjencës Kombëtare në Tiranë, Skender Brataj, shefin e Shërbimit të Mikrologjisë në Qendrën Spitalore Universitare "Nënë Tereza", Andi Koraqi, apo Mirela Cami, po ashtu pjesëtare e Task-Forcës.

Specialistët e ISHP kanë sqaruar gjithashtu se mes të prekurve ka edhe fëmijë, por në gjendje të qëndrueshme.

Gjatë kësaj periudhe, autoritetet kanë vënë në dispozicion dy spitale Covid, spitali Infektiv dhe spitali “Shefqet Ndroqi”, ose Senatoriumi për trajtimin e pacientëve të prekur.

Sa i takon raportit gjinor të të infektuarve, ISHP sqaron se përqindja më e lartë e të prekurve janë meshkuj, me 53%.

Në 4 prill, MSh njoftoi se janë konfirmuar pozitivë 29 persona, duke shënuar numrin më të lartë të të infektuarve në një ditë në vend.

Gjatë kësaj kohe, Shqipëria u përball me masa të rrepta të ndërmarra nga qeveria si formë parandalimi e virusit të ri, duke u izoluar në shtëpi fillimisht me fasha orari lëvizjeje, si për qytetarët, ashtu edhe për qarkullimin e automjeteve, por më duke " e shtrënguar" vetëm në një, nga mëngjesi deri në orë 13.00.

Pak ditë pas rasteve të para, qeveria mbylli çdo aktivitet të bareve, restoranteve, klubeve, lokale nate, disko, qendra sportive, pishina, qendra kulturore, qendra sociale dhe pezullimin e veprimtarisë dhe shërbimeve gjyqësore, dyqane bisnesi, kompanitë fasonerie, institucionet arsimore publike dhe jopublike, madje, Forcat e Armatosura të Ushtrisë zbritën në terren për të vëzhguar situatën në lidhje me zbatimin e urdhrave të ndalimit të qarkullimit për të gjithë qytetarët në kuadër të masave të ndërmarra kundër CoVid-19.

Tirana, vatra e infeksionit

Kryeqyteti vazhdon të mbetet vatra e infeksionit Covid-19. Siç shihet nga tabela, gjysma e rasteve është lokalizuar vetëm në Tiranë, e ndjekur nga Shkodra, Durrësi, Fieri.

Tiranë 196 raste

- Durrës 38 raste

- Lushnje 5 raste

- Elbasan 15 raste

- Fier 32 raste

- Kavajë 8 raste

- Rrogozhinë 4 raste

- Korçë 17 raste

- Vlorë 5 raste

- Shkodër 45 raste

- Lezhë 14 raste

- Berat 2 rast

- Has 12 raste

- Krujë 5 raste

-Tropojë 4 raste

- Pukë 4 raste

- Mirditë 3 raste

Akuzat

Opozita ka kritikuar vazhdimisht qeverinë ‘Rama’, pavarësisht situatës së pandemisë ku ndodhet vendi.

Gjatë kësaj periudhe, opozita ka lëshuar një sërë akuzash në drejtim të qeverisë, si në rastin e shtimit të testimeve për personat e dyshuar dhe jo vetëm për ata që shfaqin simptoma, siç kanë theksuar nga ana tjetër zyrtarët e shtetit.

Selia e PD ka denoncuar vazhdimisht mungesën e testeve dhe se vendi ka vetëm 2 mijë kite për testime. Ndërkohë, dy ditë më parë, ministrja e Shëndetësisë, Ogerta Manastirliu deklaroi në 'News 24' se Shqipëria kishte bërë përkesë edhe për 30 mijë tamponë të tjerë.

PD akuzoi gjithashtu qeverinë se po mban sekret 4 tenderat e Ministrisë së Shëndetësisë dhe se qeveria i ka klasifikuar tenderat si sekret shtetëror.

Tenderi 1.5 milion euro për ushqime zhvilluar nga Ministria e Mbrojtjes ka qenë një tjetër denoncim i PD, sipas së cilës e kishte një kompani me objekt aktiviteti shitjen e kompjuterave, etj.