Komisioni i Posaçëm i Apelimit shkarkoi sot nga detyra Besnik Muçin.
Ndonëse ai ende nuk e kishte mbyllur kapitullin me procesin e rivlerësimit, ai u dekretua dhe u betua te presidenti si anëtar i Gjykatës Kushtetuese.
Ndonëse KPK vendosi më 01.08.2012 ta konfirmojë Muçin në atë kohë si prokuror, kujtojmë se Komisioneri Publik kërkoi ndryshimin e vendimit të Komisionit të Pavarur të Kualifikimit dhe shkarkimin nga detyra të subjektit të rivlerësimit.
Pas konkluzioneve sot KPA vendosi të konfirmojë kërkesën e Komisionerit Publik me arsyetimin e mosjustifikimit të pasurisë dhe cënim të besueshmërisë së drejtësisë te publik te drejtësia nga ana e Muçit.
Megjithatë, shkarkimi i Muçit jo si prokuror i Krimeve të Rënda, por si anëtar i Gjykatës Kushtetuese dhe një nga të zgjedhurit e vakancave që plotëson presidenti për emërimet e kësaj gjykate pritet të sjellë një përplasje të re institucionale.
KPA e sqaroi që në nisje të seancës përmes relatorit të çështjes se vendimi vlen edhe për pozicionin e tij si prokuror, kur nisi rivlerësimi, por edhe për pozicionin aktual si anëtar i Gjykatës Kushtetuese.
“Bazuar në nenin 66 për rivlerësimin kalimtar vendosi ndryshimin e vendimit 1. 8. 2018 të KPK dhe shkarkimit nga detyra të Besnik Muçit, prokuror në momentin e fillimit të procesit të rivlerësimit, gjyqtar i Gjykatës Kushtetuese në momentin e shpalljes së këtij vendimi. Ky vendim është përfundimtar”, tha relatori.
Nga ana tjetër, vetë Muçi ka insistuar para mediave se ky vendim vlen vetëm për statusin e tij si ish prokuror dhe jo si anëtar i Gjykatës Kushtetuese.
“Vendimi i KPA-së nuk afekton funksionin tim të anëtarit të Gjykatës Kushtetuese, nuk mund t’i shtrijë kompetencat e veta mbi anëtarët e kësaj gjykate të zgjedhur sipas Kushtetutës të ndryshuar në 2016.
Pra, neni 130 i Kushtetues thotë se funksioni i anëtarit të Gjykatës Kushtetuese është i papajtueshëm me asnjë funksion tjetër. Kur u betova në presidenti e kam humbur statusin e prokurorit dhe KPA nuk ka patur kompetencë për të vijuar shqyrtimin e ceshtjes time.
Në momentin kur përfundoi statusi im si prokuror, KPA nuk ka kompetencë mbi anëtarin e GJK me ndryshimet e fundit të vitit 2016. Nga momenti që më dekretoi presidenti njoftova KLP.
Kreu i KLP, Ibrahimi me një veprim kriminal nuk ka njoftuar asnjë anëtar tjetër të KLP për dekretin e presidentit sepse sipas ligjin për statusin e prokurorëve kishte detyrim ligjor që të konstatonte mbarimin e statusit tim të prokurorit kur i shkoi dekreti i Metës. Këto janë veprime të institucioneve kushtetuese”, deklaroi Muçi.
Megjithatë, mbetet për tu parë se si do të interpretohet ky vendim nga palët, duke bërë që ngërçi për emërimet e anëtarëve të Kushtetueses të thellohet edhe më shumë. Më herët, debati nisi për vakancën e dytë ku ‘futi në sherr’ presidentin, KED dhe Kuvendin.
Për këtë vakancë, Kuvendi dhe KED njohën automatikisht Arta Vorpsin si një nga anëtaret, ndërsa presidenti dekretoi Marsida Xhaferllarin edhe pse renditej e katërta në listën e KED.
Nëse Muçi largohet nga Kushtetuesja, atëherë ajo do të reduktohet në katër anëtar. Që të jetë funksionale, Gjykata Kushtetuese duhet të ketë të paktën 6 anëtarë për të marrë në shqyrtim çështjet.
U dekretua nga presidenti si anëtar i Gjykatës Kushtetuese, KPA shkarkon nga detyra Besnik Muçin
Financuar Nga Bashkimi Europian
