Kryeministri Edi Rama ia ka arritur të tërheq sërish vëmendjen e gazetarëve të huaj në samitin BE-Ballkani Perëndimor në Sofje të Bullgarisë. Por kësaj here, Rama e ka tërhequr vëmendjen duke mos qenë protagonist në sallë.
Media gjermane, Deutsche Welle shkruan se “si rrallë herë në evenimentet e këtilla, kryeministri i Shqipërisë Edi Rama ishte jashtëzakonisht i tërhequr.”
Gazetarët e pranishëm në samit kanë qenë shumë të interesuar për qëndrimet e Shqipërisë, por Rama ka refuzuar të përballet. Të gjitha përpjekjet e gazetarëve që të marrin ndonjë prononcim lidhur me mundësinë e hapjes së negociatave mes BE dhe Shqipërisë, mbeten pa përgjigje nga kryeministri shqiptar.
Duke iu referuar burimeve nga delegacioni gjerman, ‘DW’ raporton se në samit ka pasur dhe ende ka rezerva serioze ndaj përkushtimit të Shqipërisë në evitimin e pengesave për hapjen e këtyre negociatave.
“Kjo mbetet një çështje e Bundestagut”, u tha në samit, që lë të nënkuptohet se tek deputetët gjermanë të koalicionit qeverisës ende ekzistojnë dallime në mendime.
Bojkot konferencës
Kryeministrat e Ballkanit Perëndimor dhe ata të BE-së janë shfaqur në konferencë përpara gazetarëve të pranishëm në sallë. Zoran Zaev i Maqedonisë dhe Aleksandar Vuçiç i Serbisë folën dhe u pyetën për ecurinë shteteve të tyre në procesin e integrimit. Kryeministri i Shqipërisë refuzoi të fliste.
Rama nuk u ndal as përpara gazetarëve që qëndronin jashtë sallës ku u zhvillua samiti.
Asnjë takim dypalësh
Edi Rama publikoi një video në faqen e tij në ‘Facebook’ ku shihej duke puthur dhe përqafuar disa prej liderëve të pranishëm në samit. Por përveç përshëndetjeve të shkurtra në sallën ku u organizua takimi, deri më tani nuk raportohet për ndonjë takim dypalësh të delegacionit shqiptar.
Kryeministri i Maqedonisë u ul për takime dypalëshe me homologët e Gjermanisë, Francës, Holandës, Greqisë, Estonisë etj. Edhe presidenti i Kosovës zhvilloi takime dypalëshe me kryeministrin e Belgjikës dhe përfaqësuen e BE-së, Federica Mogherini. Presidenti i Serbisë kishte gjithashtu një agjendë të ngjeshur me takimet që zhvilloi me homologët e Kroacisë, Austrisë, Suedisë, etj.
Ndërkohë, delegacioni shqiptar mesa duket është larguar pa zhvilluar asnjë bisedë konkrete në samitin e rëndësishëm.
Skandalet e drogës
Çështja e ish-ministrit të Brendshëm, Saimir Tahiri, ndodhet tashmë në Gjykatë. Ndërkohë, qeverisë së Edi Ramës i ka shpërthyer një tjetër skandal, po në Ministrinë e Brendshme, që tani drejtohet nga Fatmir Xhafaj.
Fakti që ministri i Brendshëm i Shqipërisë kishte të vëllain të dënuar me 7 vite burg për trafik droge, në një kohë kur vendit tonë i është vendosur kusht kryesor për negociatat lufta kundër drogës, ka tërhequr vëmendjen e mediave prestigjioze ndërkombëtare. Reuters shkruante dje se ka pikëpyetje të mëdha për standardet e qeverisjes në Shqipëri. /Politiko.al
Financuar Nga Bashkimi Europian
