Basha: Pushteti i lidhur me krimin është pengesë për ëndrrën e Azem Hajdarit

Sot në 20-vjetorin e vdekjes së Azem Hajdarit, kryedemokrati Lulzim Basha para politikanëve e qytetarëve shprehet se ai është gjallë edhe sot. Basha tha se sot pushteti i lidhur me krimin është pengesa për ëndërrën e Azem Hajdarit, “Shqipëria si Europa”.

“Sot nga ky shesh të shprehim vendosshmërinë tonë në emër të Azem Hajdarit se ne nuk do t’i nënshtrohemi të keqes dhe as dhunës. Ne do ta pastrojmë politikën nga krimi për t’i hapur Shqipërisë rrugë e bllokuar prej vitesh”, tha Basha.

Pjesë nga fjala e Bashës:

E kujtojmë sot Azemin si njeri, si prind, si bashkëshort, si shok, si mik, si qytetar, e respektojmë si lider, si simbol i kurjaos për liri, dinjitet dhe të drejta njerëzore.

Sot më shumë se kurrë jeta e shkurtër por e plotë e Azemit duhet të na frymëzojë dhe nxisë. Azemi tregoi se para të keqes, robërisë dhe dhunës nuk duhet heshtur por duhet luftuar. Sot në mënyrë tragjike dhe epike Azemi na bën të reflektojmë.

Pushteti i lidhur me krimin është pengesa për ëndërrën e Azem Hajdarit. Sot nga ky shesh të shprehim vendosshmërinë tonë në emër të Azem Hajdarit se ne nuk do t’i nënshtrohemi të keqes dhe as dhunës. Ne do ta pastrojmë politikën nga krimi për t’i hapur Shqipërisë rrugë e bllokuar prej vitesh. Azem ti je gjallë, na udhëheq në betejën e fitores të së mirë ndaj se keqes.