Planet e Berishës dhe Metës për të rimarrë ‘timonët’ e PD dhe LSI

Rezultatet e zgjedhjeve parlamentare të Shqipërisë më 25 prill i kanë dhënë Partisë Socialiste në pushtet të Edi Ramës një mandat të tretë historik me radhë për të drejtuar vendin.

Ndërsa Lulzim Basha në krye të opozitës nuk ia doli as këtë herë, fill pas zgjedhjeve në PD ‘shpërtheu’ debati mbi arsyet e humbjes dhe aktivizimin e zërave kritikë të cilët kërkonin dorëheqjen e kryedemokratit.

Ndërsa kjo situatë solli edhe një lloj përçarje mes aleatësh, ku ndryshe nga Basha, i cili i cilësonte zgjedhjet një ‘masakër zgjedhore’, një pjesë prej tyre si Monika Kryemadhi e LSI, Agron Duka apo Nard Ndoka e njohën rezultatin e 25 prillit.

Nën efektet e rezultatit negativ të 25 Prillit, Partia Demokratike hapi garën për zgjedhjen e kryetarit të saj të ardhshëm. I gjendur përballë një kori zërash që i kërkuan atij menjëherë dorëheqjen, drejtuesi i saj për 8 vite, Basha, përshpejtoi papritur procesin, duke afruar datën e zgjedhjeve. Mandati i tij, nga i cili zgjodhi të mos hiqte dorë, përfundonte me 22 korrik, ndërsa zgjedhjet për kryetar të PD mbahen këtë të diel, në 13 qershor.

Fushata për zgjedhjen e kryetarit të Partisë Demokratike, u zhvillua rdhe nën sfondin e një vendimi që tronditi këtë forcë politike, kur Departamenti amerikan i Shtetit njoftoi se Sali Berishës dhe familjes së tij i është ndaluar hyrja në territorin e Shteteve të Bashkuara.

Berisha e konsideroi të pabazuar një vendim të tillë, duke saktësuar se nuk kishte ndërmend të tërhiqej nga politika aktive.

Dy ditë para zgjedhjeve vjen një deklaratë e papritur nga ish lideri historik i PD, Sali Berisha.

Në një intervistë në Syri.tv, Berisha nuk e përjashtoi mundësinë e rikthimit për drejtimin e PD, që pasi dha dorëheqjen në 2013-ën kur PD humbi zgjedhjet.

Berisha tha se realitetit i ri politik i krijuar në vend, e ka detyruar atë të ndryshojë qëndrim në lidhje me angazhimin e tij politik.

“Kurrë mos thuaj kurrë! Never say never. E kam përdorur me Ramiz Alinë dhe e përdor prapë, pasi sot kam ndërruar rrugë dhe po i heq të gjitha pengesat e mia. Nuk përjashtoj asnjë të drejtë time kushtetuese më”, tha Berisha, deklaratë kjo që ka ngjallur mjaft debate.

Por, rikthimin nuk e ka paralajmëruar vetëm Berisha. Disa javë më parë, ‘marrjen e frenave’ të partisë që themeloi vetë e ka komunikuar edhe Ilir Meta, president i republikës, me të cilin kur ishte në krye të LSI, PD nën drejtimin e Sali Berishës d firmosën koalicionin qeverisës në vitin 2009.

Në 28 prill, ai tha se në përfundim të detyrës së tij si president do të rikthehet në partinë që ai vetë themeloi. Duke e konsideruar humbjen në zgjedhje të LSI-së si tjetërsim të votave, Meta theksoi se kjo ishte e pritshme, pasi nuk u morën masat e duhura për parandalimin e këtij krimi të rëndë zgjedhor.

“Presidenti Meta shpreh keqardhjen për tjetërsimin masiv të votave, por kjo ishte e pritshme, për më tepër, që nuk u morën masat e duhura për parandalimin e këtij krimi të rëndë zgjedhor.

Presidenti Meta në respekt të sakrificave për demokracinë, që ka bërë LSI, i njofton të gjithë anëtarët dhe simpatizantët e saj se më 24 korrik 2022 do të rikthehet për të marrë kartën e anëtarësisë së LSI-së dhe do t’u bashkohet përpjekjeve të të rinjve dhe të rejave për Shqipërinë e shqiptarëve”, deklaroi Meta.

Në 25 prill të këtij viti, PS fitoi zgjedhjet me 74 mandate, PD mori 59 deputetë, LSI pësoi rënie të thellë duke marrë vetëm 4 mandate, ndërsa PSD i Tom Doshit mori 3 deputetë.