Flash News

Përplasen dy automjete në aksin Laç–Patok, plagoset njëri nga drejtuesit

Aksidentohen në Berat çifti i turistëve nga Arabia

Sulmoi me thikë shkrimtarin duke e verbuar në njërin sy, dënohet me 25 vite burg autori

I biri plagosi me thikë të miturin, nëna e 14-vjeçarit: Në shtëpi erdhi me policinë

Protesta e PD/ Efektivë policie në terren, vendoset gardh metalik

E-TJERA

U mbars ‘Mali’ dhe polli një ‘Shqipëri’?

Politiko 16 Maj 2025, 12:17

U mbars ‘Mali’ dhe polli një ‘Shqipëri’?

Nga Genc Burimi

Imagjinata e një pushteti nuk ka kufi për t’ia zgjatur jetën vetes.

Regjimi i Enver Hoxhës në Shqipëri, ishte i qartë, pluripartizmi ndalohej me Kushtetutë dhe shtypej me kod penal. Regjimi i Putinit në Rusi, e lejon me ligj pluripartizmin, por mbrapa ose i burgos dhe i vret opozitarët si Navalny, ose i lë si fasadë dhe i blen. Në Turqi, Erdogan nga ana e tij, ka zgjedhur metodën e përdorimit të drejtësisë për të neutralizuar opozitën duke u justifikuar se ai nuk ndërhyn në vendimet e drejtësisë. Regjimi i Gjeneralëve në Mali, vend afrikan, po ofron këto dite një version tjetër edhe me origjinal për shfarosjen e opozitës.

Ideja konsiston të krijosh një variant miks midis sistemit mono-parti dhe pluripartizmit, duke lejuar me Kushtetutë vetëm një numër të kufizuar partish “opozitare”, jo më shumë se dy.

Gjeneralët në Mali kishin premtuar se në 2024 do të organizonin zgjedhje të rregullta dhe demokratike. Por në vend të kësaj, ata pollën një vendim këtë javë, më 13 maj, që dekreton “shpërbërjen e të gjitha partive dhe organizatave politike".

Pushteti malian njofton me këtë rast hartimin e një ligji të ri për të përcaktuar kushtet për formimin dhe funksionimin e partive të ardhshme politike si dhe kufizimin e tyre në dy ose tre parti të mëdha.

Secila nga këto pak parti të reja që do të lejohen të krijohen, do të duhet të bllokojnë shuma të mëdha financiare si garanci. Me cinizëm, pushteti premton një proces gjithëpërfshirës politik për të hartuar këtë ligj të ri që do kufizoje numrin e partive politike.

Por meqenëse të gjitha partitë politike janë tashme të deklaruara si të paligjshme me dekretin e kësaj jave, ato vetvetiu nuk do të mund të marrin pjesë ne hartimin e ligjeve të reja, pasi ato zyrtarisht nuk ekzistojnë më dhe aktivitetet e tyre tani janë të paligjshme. Shpërbërja me ligj e partive politike i ndalon ato që të bëjnë mbledhjen më të vogël apo të bëjnë deklaratën më të vogël. Një shkëmbim i thjeshtë telefonik mes dy liderëve partiakë mund të konsiderohet si një aktivitet i paligjshëm i dënueshëm me ligj. Edhe të duan të bëjnë një ankim pranë Gjykatës Kushtetuese kundër dekretit qeveritar që ndalon tani me ligj partitë politike, edhe ky akt konsiderohet i paligjshëm meqenëse partia nuk ekziston më.

Me një dekret që ndalon partitë aktuale dhe i hap rrugën një ligji, i cili do të lejojë vetëm pak parti, dhe me ndalimin e partive të diskutojnë edhe për ligjin e ri se cilat parti do të lejohen në të ardhmen, Mali është shndërruar në diçka më shumë se një diktaturë, në një Kafkaland!

Një epitet që mund t’i shkonte si dorezë edhe situatës aktuale në Shqipëri. Opozita, mbështetur në raporte të vëzhguesve ndërkombëtarë, denoncon sërish një maskaradë zgjedhjesh. U bë mbi një dhjetëvjeçar që Shqipëria ka opozitë vetëm për fasadë. Shteti-Parti del nga çdo palë zgjedhje me një mazhorancë edhe më absolute, që i jep pushtet edhe më absolut. A po mbarset edhe në Shqipëri, Mali, dhe po pjell aty një mono-parti?

Të fundit