Po kotecet e pulave dhe kasollet e lopëve, do t'i falë mazhoranca?

Partia Socialiste njoftoi sot se kishte gati një projektligj për faljen e gjobave që qytetarët nuk mund t’i shlyejnë dot. Projektligji për të cilin PD dhe PS debatuan për më shumë se 1 orë, as nuk i ishte vënë në dispozicion paraprakisht opozitës, që më pas të kalohej në diskutime.

Por, PS edhe pse nuk kishte një letër për projektligjin, kërkoi shqyrtimin me procedurë të përshpejtuar.

Reagimi i opozitës bëri që kryeparlamentarja Elisa Spiropali të nxirrte në sallën e Kuvendit një letër me disa firma, supozuar se ishte projektligji i kërkuar nga PS.

Kjo mazhorancë e cila sot me dorën në zemër kërkon të falë gjobat që po kjo mazhorancë ua ka vendosur qytetarëve, vite më parë nuk kurseu as dritare e as kotece pulash pa leje.

26 MILIONË LEKË GJOBË PËR NJË KASOLLE

Një bujk u gjobit me 26 milionë lekë vetëm për një kasolle që po ndërtonte në shtëpinë e tij në një fshat. Kasollja të cilën bujku po ndërtonte, kishte qenë fillimisht një serë e cila siç duket nuk i eci.

Kështu, bujku vendosi ta kthejë në një kasolle për lopë. Por, kjo e fundit vendosi në lëvizje instancat shtetërore që me një “operacion”, kapën në flagrancë bujkun dhe i faturuan 26 milionë lekë gjobë.

GJOBË PËR NJË KOTEC PULASH

Rasti më flagrant ishte ai i 82-vjeçares nga Narta e cila në vitin 2022, u mor në ndjekje penale pasi koteci i pulave që po rindërtonte ishte cilësuar ndërtim pa leje nga prokuroria.

Për këtë 82-vjeçarja u nxor me dhunë dhe u tërhoq zvarrë nga efektivët për t’u futur në furgonin e policisë.

3 VJET BURG PËR NJË DRITARE

Artisti i njohur, Boiken Lako u dënua nga Gjykata e Tiranës me tre vite burg, të cilat iu konvertuan në shërbim prove. Lako mori një gjobë prej 500 mijë lekësh (të vjetra) nga IKMT, pasi muzikanti, kishte hapur katër dritare në njërën faqe të objektit, të cilin do ta kthente në studio muzikore, në zonën e NISHERAKU-t në Tiranë.

Lako kishte marrë një leje në minibashkinë nr.7 për të kryer punime. Por, një telefonatë në bashki bëri që atje të shkoni inspektorët dhe të vërtetonin se gjatë punimeve ishin hapur pa leje katër dritare në katin e dytë të ndërtesës.

Kjo ka qenë edhe shkelja e kapur prej tyre që çoi Lakon para gjykatës edhe pse kishte marrë leje për kryerjen e punimeve.

TË VETËVRITESH PËR 35 MIJË LEKË

Qamil Zela u arrestua në vitin 2014 pasi u burgos për 35 mijë lekë të vjetra. Zela u vetëvar në burgun e Rrogozhinës, pasi në banesë kishte vetëm një sahat nga dy që duhej të kishte sipas autoriteteve. Asokohe, familjarët e tij i bënë thirrje qeverisë t’i jepej fund burgosjeve për vjedhjet e energjisë elektrike.

Rastet e sipërpërmendura janë produkt i mazhorancës që sot, bërtiste nga Kuvendi me krenari se për sa kohë që kishin votat e shumicën në Parlament, do t’i falnin gjobat. Këtë deklaratë, ministri i Drejtësisë, Ulsi Manja, e bëri i dehur nga entuziazmi për të mos pritur fushatën zgjedhore për të lançuar projektligjin, si një triumf i PS.