Coronavirusi vijon të regjistrojë viktima të reja në të gjithë botën, në vatra të ndryshme si në bare dhe restorante, zyra, tregje dhe kazino, duke konfirmuar gjithnjë e më shumë atë që kanë thënë shumë shkencëtarë para disa muajsh: Virusi qëndron në ajër brenda, duke infektuar personat që frekuentojnë ato ambiente.
Nëse transmetimi nga ajri është një faktor domethënës në pandemi, sidomos në hapësirat e mbushura me njerëz me ventilim të dobët, pasojat për kontrollin do të jenë të rënda. Maska mund të jenë të nevojshme në ambiente të mbyllura, edhe në ambiente të mëdha sociale. Punëtorët e kujdesit shëndetësor mund të kenë nevojë për maska N95 që filtrojnë madje edhe pikat më të vogla të frymëmarrjes pasi kujdesen për pacientët e infektuar.
Sistemet e ventilimit në shkolla, azile pleqsh, rezidencash dhe biznese mund të kenë nevojë të minimizojnë ajrin e ricikluar dhe të shtojnë filtra të rinj të fuqishëm. Dritat ultravjollcë mund të jenë të nevojshme për të vrarë grimcat virale që lundrojnë në pika të vogla në ambiente të mbyllura.
Organizata Botërore e Shëndetit ka kohë që mendon se coronavirusi përhapet kryesisht nga sperklat e mëdha të frymëmarrjes, të cilat shpërndahen nga njerëzit e infektuar përmes kollës dhe teshtitjes dhe bien shpejt në dysheme.
Por në një letër të hapur drejtuar OBSH, 239 shkencëtarë në 32 vende të botës kanë përshkruar provat që tregojnë se grimca edhe më të vogla mund të infektojnë njerëzit, dhe po bëjnë thirrje që agjencia të rishikojë rekomandimet e saj. Studiuesit planifikojnë ta botojnë letrën e tyre në një revistë shkencore javën e ardhshme.
Edhe në raportin e fundit në lidhje me situatën, lëshuar në 29 qershor, OBSH tha se transmetimi në ajër i virusit është i mundur.
Udhëzimi i OBSH për kontrollin e infeksionit, para dhe gjatë kësaj pandemie, ka promovuar shumë rëndësinë e larjes së duarve si një strategji parësore parandaluese, edhe pse ka prova të kufizuara për transmetimin e virusit nga sipërfaqet. (Qendrat për Kontrollin dhe Parandalimin e Sëmundjeve tani thonë se sipërfaqet ka të ngjarë të luajnë vetëm një rol të vogël.)
Dr Benedetta Allegranzi, udhëheqëse teknike e OBSH në kontrollin e infeksionit, tha se provat për virusin që përhapet nga ajri ishin jo bindëse.
“Sidomos në dy muajt e fundit, ne kemi deklaruar disa herë që ne e konsiderojmë transmetimin në ajër të jetë e mundur, por sigurisht nuk është mbështetur nga prova të forta apo edhe të qarta,” tha ajo. “Ka një debat të fortë për këtë.” Përshtatur nga New York Times
Financuar Nga Bashkimi Europian
