Sekuestrohet vila e Ballukut në Dhërmi, avokati: Vipat e përfshirë rrezikojnë deri në 15 vite burg...

Prokuroria e Posaçme (SPAK) ka thelluar hetimet duke rënduar pozitën e ish-zëvendëskryeministres me dy akuza të reja dhe tejet serioze: korrupsion pasiv dhe pastrim i produkteve të veprës penale.

Avokati Franc Nuri ka shpjeguar në  Syri tv, se nga ana juridike, pasojat janë jashtëzakonisht të rënda.

Vepra e korrupsionit pasiv dënohet nga 4 deri në 12 vite burg, ndërsa ajo e pastrimit të parave parashikon penalitete nga 5 deri në 10 vite. Nëse këto akuza faktohen në gjykatë, me bashkimin e dënimeve, personat e përfshirë në këtë dosje mund të rrezikojnë të vuajnë nga 10 deri në 15 vite heqje lirie.

Pavarësisht mbrojtjes fillestare politike përmes kartonëve në parlament dhe një vonese të dukshme në reagimin fillestar të drejtësisë, lëvizjet e fundit dëshmojnë kalimin në një fazë vendimtare dhe goditëse të hetimeve.

PJESE NGA INTERVISTA

Arnold Kariqi: SPAK ka vijuar hetimet ndaj ish-zëvendëskryeministres Belinda Balluku duke rënduar tashmë akuzat ndaj zyrtarës së lartë të Partisë Socialiste dhe qeverisë. Në njoftim zyrtar SPAK ka bërë të ditur se është sekuestruar një vilë e Ballukut në Dhërmi ku hetohet edhe për skemën e pastrimit të parave. Çfarë do të thotë kjo tashmë avokat?

Franc Nuri: Atëherë, është pak a shumë ajo që ne e kishim parashikuar, e kishim thënë, e kishim paralajmëruar edhe përpara seancës së 12 marsit. Tashmë po bëhen gati 3 muaj nga ajo seancë famëkeqe, ku Kuvendi i Shqipërisë, me një vendim të paprecedent do të thoja, votoi kundër, shumica parlamentare socialiste, e Edi Rama, votoi kundër kërkesës së SPAK-ut për lejimin e arrestimit të ish-zëvendëskryeministres Balluku. Por aty ne e parashikuam që me shumë gjasa hetimet ishin në vijim, vazhdonin, po intensifikoheshin dhe kishte premisat e larta që akuza do të ndryshonte dhe do të rëndohej akuza. Tashmë, me këtë njoftim të dalë para pak minutash, sikundër ju e lançuat, nga SPAK, rezulton se ndaj Belinda Ballukut janë shtuar dy akuza të reja, tepër të rënda. Akuza për korrupsion pasiv dhe akuza për pastrim parash. Pastrim të produkteve të veprave penale, por e njohur dhe nga qytetarët për më thjeshtë si vepra e pastrimit të parave. Përveç akuzës së parë për shkelje të barazisë në tendera? Dhe ju kujtohet mbrojtja që bëri dhe grupi parlamentar i Partisë Socialiste dy ditë përpara seancës së 12 marsit, ku e mbështesnin refuzimin e arrestit vetëm me faktin se kjo vepër, pra vepra e shkeljes së barazisë në tendera, që ishte hetuar zonja Balluku deri në atë moment, ishte një vepër relativisht e lehtë, dhe nuk ishte sipas tyre arsye për të miratuar kërkesën e SPAK-ut. Por tashmë ja ku kemi dy akuza të reja. Atëherë çfarë mësojmë nga komunikimi i SPAK-ut? Mësojmë se gjykata e posaçme ka vendosur sekuestro preventive mbi një vilë në Dhërmi me vlerë rreth 145 mijë euro, që SPAK dyshohet se është përfitim i paligjshëm. Sipas hetimit mësohet se vila dyshohet se mund të jetë marrë në këmbim të favorizimit të një kompanie të caktuar në një tender të kompanisë Albcontrol. Po ashtu, është përfshirë në këtë çështje, sipas njoftimit të SPAK-ut, edhe ish-futbollisti i kombëtares, Igli Tare, apo ish-drejtuesi sportiv i ekipit të Milanit. Atëherë, çfarë do të thotë konkretisht kjo? Këto dy akuza. Akuza e parë, korrupsioni pasiv i personave që ushtrojnë funksione publike, parashikohet nga neni 259...

Arnold Kariqi: Taktikë e njohur kjo nga qeveritarët avokat

Franc Nuri: Për pjesën e përfshirjes së futbollistëve apo të vipave?

Arnold Kariqi: Po, emrave të tjerë, sigurisht.

Franc Nuri: Po, taktikë faktikisht që i ka dalë boja dhe po i del boja tashmë, duke përdorur prestanome apo duke përdorur emra nga showbizi apo emra nga personalitete nga bota e artit e tjerë me radhë. Kam përshtypjen se do duhet të bëjnë kujdes të gjitha personat, që në të shkuarën apo që mund të jenë akoma duke kryer aktivitete të tilla, sepse vjen një ditë që do japësh llogari përpara drejtësisë. Megjithatë duhet ta themi që të gjithë janë të prezumuar të pafajshëm sipas kushtetutës, deri në shpalljen fajtor me vendim të formës së prerë. Desha t'i kthehem vetëm pak veprave penale që dhe qytetarët ta dinë se çfarë rrezikojnë personat e përfshirë tashmë me këto akuza, për të cilën është bërë dhe sekuestrimi me vendim të gjykatës së posaçme, të kësaj vile tashmë në jug të Shqipërisë. Vepra e parë, ajo e korrupsionit pasiv të personave që ushtrojnë funksione publike, po themi korrupsioni i zyrtarëve të lartë, dënohet nga 4 deri në 12 vjet burg.

Ndodh kur një zyrtar publik kërkon, merr ose pranon premtime për përfitime të parregullta për shkak të detyrës së tij. Ndërkohë pastrimi i produkteve të veprës penale, neni 287 i Kodit Penal, ajo që njihet ndryshe pastrimi apo larja e parave, dënon fshehjen, transferimin, konvertimin ose maskimin e pasurisë që buron nga vepra penale, e korrupsionit në këtë rast apo dhe nga vepra të tjera penale. Kjo vepër, kjo e dyta, pra pastrimi apo larja e parave, dënohet me burg nga 5 deri në 10 vjet. Dhe me gjobë mund të dënohet shtesë, pra plus dënimit me burg. Sidomos nëse kjo vepër kryhet në bashkëpunim, në mënyrë të përsëritur, apo duke përdorur veprimtari profesionale, dënimi mund të shkojë nga 7 deri në 15 vite burg, përveç gjobës që mund të vendosë gjykata. Pra, për ta bërë më të thjeshtë, nëse do provoheshin të dy akuzat e SPAK-ut, këto dy akuzat e reja tashmë, pa llogaritur akuzën e parë atë të shkeljes së barazisë në tendera, teorikisht një person që ka këto dy akuza, korrupsionin pasiv dhe pastrimin e parave, gjykata do të bënte, nëse i shpall fajtor, do të bënte bashkimin e dënimeve, që nuk është bashkim aritmetik duhet ta themi. Por zakonisht gjykata merr dënimin më të lartë dhe mund ta tejkalojë. Për ta bërë shkurt, personat rrezikojnë 10 deri në 15 vite burg. Kjo besoj që është ajo që mund të themi në konkluzion të këtyre akuzave tepër të rënda tashmë të ngritura nga ana e SPAK-ut, dhe kuptohet që dënimi mund të shkojë gjithmonë në varësi edhe të rolit të personave, të provave dhe rrethanave rënduese që mund të ketë gjithësecili nga personat e përfshirë.

Arnold Kariqi: Avokat, ka deklaruar disa herë zonja Balluku që nuk ka lidhje me akuzat, por tashmë duket se SPAK-u ka kaluar në një tjetër etapë. Pyetja ime është, sa rëndohet pozita e saj dhe sa mund t'i shërbejë imuniteti që ka aktualisht si deputete? Ose sa të lidhura i ka duart SPAK përballë personazhit Belinda Balluku për të shkuar më tej flas?

Franc Nuri: Unë mendoj që SPAK me këtë njoftim që ka bërë sot, është fundi i konkretizimit të dërgimit të çështjes, po plus edhe kërkesës për sekuestron e vilës, marrjes në pyetje të këtyre personave. Ju kujtoj që përpara pak ditësh edhe vetë Igli Tare u paraqit në SPAK për të dhënë shpjegime, apo mund të kenë vajtur dhe persona të tjerë. Pra unë mendoj që SPAK ka shkuar dhe ka ecur përpara me këtë çështje, ndoshta nuk ka ecur me atë ritmin e shpejtë, të menjëhershëm që mund të kishte pritur dikush me të drejtë. Pra, mbas 12 marsit kur u refuzua kërkesa nga mazhoranca socialiste me forcat e kartonave, që e mbrojti praktikisht kolegen e tyre Belinda Balluku nga arresti, shumë persona menduan që SPAK do të reagonte brenda një jave, brenda pak ditëve, brenda dy javësh, kjo gjë nuk ndodhi…