Për thuajse gjithë ndeshjen me Fiorentinën, sonte Interi ishte në festë dhe me tri pikë diferencë nga Juventusi ndjekës, por në fund ndodhi e papritura. Violët barazuan 1-1 zikaltrit, të cilët gjithsesi pozicionohen të parët në tabelën e renditjes së kampionatit italian, por vetëm golaverazhi i ndan nga “Zonja e vjetër”.
Dy golat e ndeshjes u shënuan nga Valero (për Interin) në të 6′ dhe nga Vlahovic (për vendësit) në sekondat e fundit të kohës shtesë. Duhet përmendur edhe një gol nga Lautaro Martinez, por që për fatin e tij të keq u anulua nga VAR.
Në ndeshjen tjetër të darkës, Valencia-Real Madrid, rezultati ishte i njëjtë, por me një fund nga krahu tjetër. Nëse në Serie A ndodhi që skuadra më e vogël barazoi në fund, në Spanjë ishin “Los Blancos” ata të cilët u desh të prisnin 95 minuta për të shënuar golin e barazimit. Benzema shpëtoi madrilenët nga turpi, sepse një humbje me Valencian do të ishte e tmerrshme për trajnerin Zidane (jo se barazimi është ndonjë rezultat që nuk prish punë në pozitat e tij dhe të skuadrës).
