Më 6 mars garon Basha kundër Bashës

Alfred Lela

‘Zgjedhje të pjesëshme’ i quajnë këto të 6 marsit. Mund të quhen edhe ‘zgjedhje të jashtëzakonshme’. Në kuptimin se gjysma e bashkive në garë kanë rënë, jo nga shkaqe të rutinës politike, por se janë kapur nga presa e korrupsionit dhe dekriminalizimit.

Kjo e shpjegon më së miri gjendjen politike në vend gjatë dekadës së fundit.

Por, duam apo nuk duam, këto nuk janë zgjedhje për Edi Ramën dhe qeverinë e tij. Këto janë zgjedhje për Lulzim Bashën dhe ‘opozitën e tij’. Ose çfarë ka mbetur nga opozita, dikur e zhurmshme, dikur që harkohej nga çami Shpëtim Idrizi te greku Vangjel Dule.

Lulzim Basha ka një raport llahtarie me zgjedhjet. Në 2011 u diskutua egër fitorja e tij në Tiranë. Në 2019 i bojkotoi. Gjithë të tjerat tha se ia vodhën.

Por, këto zgjedhje janë edhe më ndryshe.

Ai e ka çuar ‘opozitën e tij’ në atë pikë sa i duhet të garojë jo me qeverinë, por me vetveten. I duhet të përballet me të shkuarën e tij, duke qenë edhe vetë pjesë e saj, edhe pse sot del e thotë: Jam e ardhmja.

Z. Basha do të ketë përballë Sali Berishën dhe mbështetësit e tij në PD. Do të ketë përballë atë pjesë demokratësh që kanë punuar me të, por që nuk i besojnë më.

Do të ketë përballë edhe veten, sigurisht.

Duke thënë se ka me vete 95 përqind të demokratëve, i duhet që në zgjedhjet e 6 marsit t’i tregojë këta muskuj.

Këto janë zgjedhjet e para ku ai nuk garon me Sali Berishën nga mbrapa. Prej pak muajsh thotë se, gjithë këto vite, Doktori ka qenë pengesa.

Tani është koha që t’u tregojë të gjithëve sa i vlen lëkura në liri.