Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

7 liqejt e Lurës dhe 700 rrenat e Ramës

Politiko 16 Qershor 2018, 14:53

Mina Hysa

Edi Rama ishte sot në Lurë dhe foli live për minuta të tëra, harxhoi kohë televizive në satelit, rrjedhimisht të kushtueshme, në një aktivitet të quajtur “Për prezantimin e projektit të zhvillimit të Lurës”. Vizita e një Kryeministri në çdo pjesë të territorit është normale, por sot në Lurë Rama, edhe pse përballë një grupi qytetarësh me bindje të majta, dhe votues të PS (madje disa kanë shkuar nga Tirana dhe Dibra me porosi partie, për të shtuar atë grusht njerëzish që e pritën), dëgjoi prej tyre atë çfarë kjo qeveri nuk ka bërë në 5 vjet.

Regjia e Rilindjes, si dhe në takimet e tjera, nuk ka mundur dot të ndalojë pakënaqësinë qytetare që i përplaset në sy Kryeministrit, duke ia numëruar një nga një premtimet e pambajtura. Sot në Lurë, një nga banorët i tha Ramës: S’ka nevojë të na rikonstruktosh kullat, se ia dalim vet, por na bëj rrugën se ti të gjitha daljet i ke reklamë për vete, jo vetëm në Lurë por dhe në gjithë Shqipërinë.

Aty Rama e humbi toruan dhe nisi të bëjë leksione, siç rëndom e bën në pseudo-dëgjesat e tij.

Në Lurë ia numëruan të gjitha: e nisën me mungesën e infrastrukturës rrugore, ku mrekullia e natyrës është thuajse e izoluar, pasi mundësia e qarkullimit të qytetarëve apo dhe turistëve është tejet e vështirë, qoftë nga lidhja me Rrëshenin apo dhe Dibrën, si dhe mes fshatrave me njëri-tjetrin. Pa harruar as vështirësinë që të ngjitesh te liqenet. I thanë që furnizimi me energji vjen nga Fushë-Alia (kur Lura ka dy HEC-e), dhe në dimër shpesh telat këputen dhe mbeten në erresirë.

I thanë se kanë burime ujore pa fund, që mund të furnizojmë edhe Dibrën, por nuk vadisin dot tokat e tyre. I thanë që shkollat janë pa çati dhe pikojnë.

I thanë që shëndetësia është derexhe, ku veç mjekut që vjen, nuk ka as dhe një aspirinë. I thanë që të punësuarit janë me shkollë të mesme, dhe mbeten pa u punësuar ata që kanë mbaruar të lartën.

I thanë që zona ka nevojë për mbështetje nga qeveria që të zhvillohet turizmi, së pari duke zhvilluar infrastrukturën dhe ripyllëzuar pyjet, pas një pastrimi të plotë që duhet t’i bëhet zonës. Iu ankuan dhe për nivelin e ulët të jetesës, spastrimeve në administratë, pagave dhe pensioneve të ulëta me të cilat, siç i tha një banor i Lurës, me 56 mijë lekë të vjetra pension, po të mos kishte fëmijët në emigracion do vdiste për bukë.

Mbeti pa fjalë sa nuk ktheu përgjigje.

Por ai dëgjoi, u zu me ata që nuk i bënë elozhe, i këshilloi, premtoi, siç ka bërë prej fushatës së vitit 2013 e në vazhdim, bëri lojëra fjalësh, jo projekti, jo financimi i turizmit familjar etj., dhe pa asgjë konkrete iku për drekë.

Nesër do jetë në Dibër e më pas në Klos, me të njëjtin zhargon fjalësh, me të njëjtën propagandë ku do ta ngrejë nivelin e spektaklit me rrugën e Arbrit përballë administratës së kërcënuar të dalë në takim.

Si në gjithë Shqipërinë, edhe në Lurë, tha fjalët e përgjithshme, por asgjë konkrete se çfarë realisht do të bëjë për Lurën. Nuk premtoi asgjë konkrete. Siç më tha një banor i Lurës: Erdhi, dëgjoi, nuk pranoi dhe premtoi asgjë të prekshme dhe iku për drekë.

Sa seriozisht e ka Rama zhvillimin e Lurës?! Unë shpresoj ta ketë dhe nëse do të bëjë diçka do ishte gjë e mirë, por kam shumë pak besim. Kjo për faktin se ende nuk ka asnjë projekt zhvillimi, si nga Bashkia Dibër ashtu dhe nga qeveria Rama. Eshtë kokëfortë fakti se qeveria e Edi Ramës nuk e ka listuar Lurën, këtë mrekulli të natyrës shqiptare, te financimi i 100 fshatrave turistikë që gjoja do të bëjë këtë mandat. Ka zgjedhur psh të përfshijë te 100 fshatrat turistikë 14 fshatra në Gjirokastër dhe 13 në Vlorë, dhe mirë ka bërë, nëse do e mbajë premtimin, por Lurën nuk e ka përfshirë në modelin e Rilindjes Urbane, program, sipas qeverisë, i fokusuar te turizmi dhe agro-biznesi.

Sipas njoftimit të qeverisë këto fshatra janë zgjedhur mbi bazën e potencialit të tyre turistik dhe pritet të shndërrohen në qendra të një lloj turizmi të ri, të panjohur më parë në vendin tonë, turizmi rural.

Pyetja që i shtrohet sot Kryeministrit është: A nuk e ka Lura këtë potencial turistik, kulturor dhe historik?!