“PS merr 84 mandate”, si e paralajmëroi Open Data rezultatin e 11 Majit?

Numërimi i votave brenda vendit ka përfunduar dhe aktualisht Partia Socialiste numëron 83 mandate, ndërsa koalicioni PD-AShM ka marrë 50 mandate.

Një projeksion i Open Data Albania, i realizuar dy vite më parë, parashikoi fitoren e socialistëve me numër të njëjtë mandatesh. Projeksioni u realizua në maj të vitit 2023, pas zgjedhjeve vendore të 14 majit.

Sipas këtij projeksioni të ODA, nëse shkohej pas dy viteve në zgjedhje, me të njëjtin sistem zgjedhor, ndarje territoriale dhe disa parti të vogla në garë, “Partia Socialiste fiton 84 mandate, 10 më shumë se në zgjedhjet e 2021. Ky është paradoksi i parë i konstatuar në këtë kalkulim për projeksion. Ndërsa PS ka marrë në 2023 më pak vota se në 2021, formula dhe sistemi i garantojnë më shumë mandate deputetësh.”

Sot, teksa pritet dhe përfundimi i votave të diasporës, PS numëron po 84 mandate, njësoj sa ka parashikuar projeksioni i Open Data Albania.

PROJEKSIONI

Partia Socialiste, 84 Deputet, 10 më shumë se 2021.

Bashkë Fitojmë, 34 deputet. Në këtë subjekt bëjnë pjesë Partia e Lirisë ish LSI drejtuar nga Ilir Meta dhe pjesa e të larguarve nga Partia Demokratike njohur si Foltorja e ish kryetarit zotit Sali Berisha. Po këtu janë edhe Partia Bashkimi për të Drejtat e Njeriut e Vangjel Dules dhe Partia Demokristiane kryetar zoti Nard Ndoka. Krahasimi tipik me 2021 nuk është i mundur për këtë Subjekt.

Partia Demokratike Zyrtare me votat e marra në zgjedhjet e maj 2023 në një projeksion 2025 merr vetëm 11 Deputet.

Partia Social Demokrate me kryetar Tom Doshi merr në projeksion 9 mandate, pra 6 më shumë se 2021.

Edhe Partia Agrare Ambientaliste me Kryetar Agron Duka do të merrte 2 mandate.

Parti të tjera edhe pse kanë vota domethënëse në numër, nuk do të merrnin në Zgjedhjet e 2025-ës asnjë mandat. Jashtë kuvendit do të mbetej në një rezultat si ky i 14 majit edhe Arlind Qori i Lëvizja Bashkë apo Endri Shabani i Nismës Thurje.

Janë 282 850 vota të marra nga parti të tjera, që nuk prodhojnë asnjë deputet në 2025 nëse mbetemi tek sistemi, kushtet dhe numrat e 14 majit.

Dyqind e tetëdhjetë e dy mijë e tetëqind e pesëdhjetë votues janë sa 29 deputet nëse konsiderojmë si mesatare votash për mandat 9600 vota (totali vota te vlefshme 1 344 275 pjesëtohet me 140 Mandate).

Penetrimi Parlamentar i partive të reja apo të vogla në një sistem zgjedhor proporcional rajonal, me formulën e Kodit Aktual është i pamundur. I vetmi rezultat apo përfitim i partive të vogla që marrin së bashku 282 850 votues është e drejta për tu financuar nga Buxheti i Shtetit si parti politike, që kalojnë pragun kombëtar prej 1 përqind, ose arrijnë 10 mijë vota total.

ODA, theksonte në projeksionin e saj, se formula favorizonte partinë më të madhe në vend, pra PS.

“Nëse shohim rezultatin në votë dhe në mandate në Zgjedhje 2021 (kur në listë ishin vetëm 12 subjekte) me Projeksion 2025 sipas votës së 14 Majit (tashmë me 40 subjekte garuese), rezulton një raport i zhdrejtë vota me numër deputetësh”, thuhej në projeksion.