Ish-ministri i Financave Arben Ahmetaj deklaroi se brenda Krishtlindjes, do të pastrohen nga rrënojat qytetet e dëmtuara nga tërmeti dhe do të bëhet vlerësimi me ekspertë dhe specialistë.
Në emisionin “Real Story” në “News 24”, ai tha do të ndërtohen qyteza në Tiranë, në Durrës, Thumanë dhe në Lezhë.
“Ne mendojmë se janë rreth 5000 familje që nuk do munden të kthehen më në shtëpinë e tyre, por vlerësimi do e tregojë. Mund të ketë shumë më shumë, sepse lëvizja është gjithmonë e në rritje. Ne kemi riformatuar paketën e rindërtimit. Do ketë qyteza urbane në Durrës. Nuk do lihet asnjë qytetar, asnjë familje jashtë. Po do ndërtohen qyteza urbane në Durrës, në Tiranë, te ish-zona e Auto-traktorit dhe Kombinat, Thumanë dhe në Lezhë”, u shpreh Ahmetaj.
Ahmetaj tregon se dëmi nga tërmeti është i konsiderueshëm, por asnjë qytetar a familje nuk do të ngelet jashtë e pa strehim.
“Mendohet se dëmi shkon edhe 500- 600 milionë euro dëme. Ne kemi menduar për strehimin për qytetarët. Sigurisht që qeveria mund të kritikohet”.
