Flash News

Aksident te "Shkalla e Tujanit", kamioni përmbyset në mes të rrugës, plagoset shoferi

By pass-i i Vlorës, zvarritje punimesh dhe rritje kostosh

Milan pritet të heqë dorë nga transferimi i Granit Xhakës

Inceneratori jashtë funksionit, përfshihet nga flakët fusha e mbetjeve në Elbasan

Aksident në aksin Lezhë-Shëngjin, një i plagosur

KRYESORE

Arben Ahmetaj, ministri ‘i shënjestruar’ për korrupsion/ Denoncimet e opozitës dhe ‘shuplaka’ e raportit të DASH për koncensionet

Politiko 13 Dhjetor 2019, 15:25

Arben Ahmetaj ka qenë në shënjestër të akuzave të opozitës për korrupsion. Pas shkarkimit një vit më parë nga kryeministri Edi Rama si ministër i Ekonomisë dhe Financave bashkë me 6 ministra të tjerë, tërmeti i 26 nëntorit e rikthen Ahmetajn rikthehet sërish në kabinetin qeveritar. Rama e propozon sot si ministër Shteti për Rindërtimin, ndërsa Meta nuk heziton ta dekretonte. Por, Ahmetaj ka qenë vazhdimisht i akuzuar për korrupsion dhe afera të ndryshme nga ana e opozitës si lidhur me lidhur me inceneratorët, apo me politikat e ndjekura nga institucioni që ai drejtonte.

Po kujtojmë disa nga akuzat kryesore për korrupsion në drejtim të Arben Ahmetajt.

Në vitin 2016 Patria Demokratike hodhi akuzat ndaj ministrit Arben Ahmetaj se ka udhëtuar dhjetëra herë me avionë çarter jashtë vendit, me një kosto të madhe për çdo fluturim që rëndon në xhepat e taksapaguesve shqiptarë.

“1 udhëtim 40 mijë euro”, PD publikoi listën e plotë të ministrit Ahmetaj me Charter

“Fotokopja e pasaportës, numrat e tij personal dhe numri i udhëtimeve me çarter. Një fluturim çarter kushton të paktën 40 mijë euro, dhe me shëtitjet e tij prej sheiku, Ahmetaj ka shpenzuar qindra mijë euro.

Ky është një rast flagrant abuzimi dhe korrupsioni, dhe Arben Ahmetaj e ka për detyrë të tregojë ku ka shkuar, për çfarë, dhe kush ia ka paguar udhëtimet. Cili koncesion është dhënë, ose cila pasuri e vendit është falur pas këtyre fluturimeve çarter të Ahmetajt”, tha ish-deputeti demokrat Sherefedin Shehu në deklaratën për mediat.

Rasti i inceneratorëve

Partia Demokratike në dhjetor të vitit 2017 e akuzoi Ahmetajn, në atë kohë ministër i Financave dhe Ekonomisë se po vidhte qindra milionë euro për tre inceneratorë.

Përmes një prononcimi nga selia e PD-së, Jamarbër Malltezi solli detaje për skemën e asaj që e quajti zhvatje të miliona eurove për të ndërtuar 3 fabrikat e djegies së plehrave në Elbasan, Fier dhe Tiranë, inceneratorëve fantazëm.

Çfarë deklaroi Malltezi, më poshtë deklarata:

Partia Demokratike e bëri publik këtë skandal dy javë më parë, por sot do të sjellim detaje për skemën e zhvatjes së miliona eurove para publike për të ndërtuar 3 fabrikat e djegies së plehrave në Elbasan, Fier dhe Tiranë.

Të tre inceneratorët janë kaparisur me Klodian Zoton, bashkëpunëtori më i afërt i Arben Ahmetajt. Ata kanë punuar së bashku që në kohën e aferave shumëmilionëshe të Arben Ahmetajt me impulset telefonike të kompanise publike Albetelekom.

Përpara se ta çonte tek inceneratorët, Klodian Zoto i shërbente Arben Ahmetajt pranë Vilma Nushit, në konçesionin 120 milionë Euro të check up-it.

Deri më sot, ata kanë mbyllur kontratat për të marrë nga paratë publike mbi 50 milionë Euro, 22 milionë Euro për inceneratorin e Elbasanit dhe 28.2 milionë Euro për inceneratorin e Fierit. Është duke u mbyllur kontrata edhe për Tiranën për 128 milionë Euro të tjera! Të gjitha kalojnë në 1 dorë, atë të Klodian Zotos, thënë ndryshe të Arben Ahmetajt.

Pra, plot 178 milionë euro (pa TVSH) nga taksat tona që po ndahen mes Edi Ramës, Arben Ahmetajt, Lefter Kokës dhe sekserit të tyre në kundërshtim me ligjet dhe strategjitë në fuqi.

Të nderuar qytetarë, kontrata prej 28 milionë euro për inceneratorin e Fierit, nuk është botuar ne Fletoren Zyrtare, edhe pse ajo është firmosur një vit më parë.

Në bazë të kësaj kontrate të tipit mafioz, që nuk shpallet publikisht, Klodian Zoto, dmth Arben Ahmetaj, ka marrë deri tani 5 milionë euro nga taksat tona për një incenerator fantazmë, sepse nuk ka nisur akoma ndërtimin.

Pasi mori nga shteti 22 milionë euro për djegësin e Elbasanit dhe 28 milionë për atë të Fierit “me çelësa në dore”, Klodian Zoto firmosi me një Italian kontratat për të marrë djegësit “me çelësa ne dore” përveç 15 milionë euro. Kësisoj 7 milionë euro u përlanë për djegësin e Elbasanit dhe mbi 13 milionë euro për të Fierit, pra përmbi 20 milionë euro vjedhje brenda pak javësh!

Raporti i DASH i vitit 2018 për Shqipërinë: Koncensionet cënojnë konkurrencën

Departmenti Amerikan i Shtetit (DASH) publikoi raportin e pritur për klimën e investimeve për Shqipërinë për vitin 2018.

Në të mbizotëronin shqetësimet për korrupsionin, mungesën e transparencës në tendera, teksa Shqipëria konsiderohej si një vend i vështirë për të bërë biznes dhe ku favorizohen kompanitë e lidhura me politikën.

Me shqetësim raportoheshin dhe projektet e partneritetit publik privat, të cilat vlerësoheshin se kanë kufizuar konkurrencën, ndërsa nuk ka një analizë kosto-përfitime të tyre. Tjetërsimi i pronësisë ishte një tjetër problem që kanë raportuar investitorët e huaj.

“Qeveria kishte nënshkruar më shumë se 200 kontrata PPP deri në fund të vitit 2017”, thuhej në raport.

Ndërsa Ahmetaj, pas publikimit të këtij raporti doli në një konferencë për shtyp ku tha se kontratat e partneritetit publik privat nuk janë një shpikje shqiptare, por që përdoren në gjithë botën.