Pak para mesnatës së mbrëmshme, një atentat me armë zjarri është shënuar në fshatin Zezë, në Krujë.
Për pasojë një grua ndërroi jetë dhe nipi i saj u plagos pas një breshërie plumbash në drejtim tyre.
“Më datë 21.09.2019, rreth orës 23:50, jemi njoftuar se në fshatin Zezë, Krujë janë plagosur me armë zjarri shtetasit M.H., dhe Sh.B.,
Shtetësia Sh.B., ka ndërruar jetë ndërsa shtetasi M.H., ndodhet në Spitalin e Traumës Tiranë nën kujdesin e mjekëve. Grupi hetimor po punon për identifikimin e autorëve dhe sqarimin e rrethanave të ngjarjes”, sqaron paraprakisht policia.
Por, shënjestra e atentatit, Mariglen Haka nuk është një emër i panjohur për drejtësinë, ndërsa e vdekur mbeti halla e tij, Shpresa Basha, pak pasi mbërriti në spital.
Në qershor të vitit 2011, Haka është shoqëruar si i dyshuari kryesor për vrasjen e biznesmenit të kromit Nadien Zeneli, në zonën e Bllokut në Tiranë.
Në atë kohë u tha se e kishte vrarë biznesmenin pasi dyshonte se viktima ishte i përfshirë në vrasjen e vëllait të tij, Roland Haka, në vitin 2004.
Nga ana tjetër, ai njihet edhe si anëtar i bandës së Niklës, i arrestuar në shtator të një viti më parë, të akuzuar për armatime dhe municione luftarake pa leje si dhe për prodhim dhe shitje të lëndëve narkotike.
Gjatë këtij operacioni u arrestua edhe Valter Bami, vëllai i Durim Bamit, ky i fundit i dënuar me 8 muaj burg për kallëzim të rremë ndaj atentatit të ish-deputetit Tom Doshi.
Financuar Nga Bashkimi Europian
