Bozdo akuza qeverisë Rama: Ka braktisur minatorët dhe Bulqizën, ka bërë aleancë me krimin

Anëtari i kryesisë së PD-së, Eno Bozdo, akuzoi qeverinë Rama se prej kohësh ka braktisur minatorët dhe Bulqizën. Sipas tij, këtë e tregoi qartë protesta e sotme e Sindikatës së Bashkuar të Minatorëve përpara kryeministrisë.

“Kërkesat e Sindikatës për paga më të larta dhe kushte më të mira pune janë të drejta absolute të punëtorëve. Qeveria Rama nëpërmjet Këshillit Kombëtar të Punës dhe Inspektoriatit të Punës kanë tashmë përgjegjësinë direkte prej disa muajsh, të trajtojnë më shumë seriozitet gjendjen e vështirë të minatorëve në Bulqizë e kudo, dhe të ofrojnë një zgjidhje të arsyeshme për kërkesat e tyre.”, sjkroi Bozdo në Facebook.

Ai shpreh shqetësimin se pavarësisht se protesta vazhdon prej muajsh, Rama ka zgjedhur që t`i injorojë minatorët plotësisht.

“Ndjeshmëria e tij për Bulqizën, minatorët edhe dhe qytetarët e saj, është shumë e qartë kur kërkon t’u emërojë me dhunë si kryetar bashkie një konsumator ordiner të kokainës.”, tha ai duke shtuar “Partia Demokratike mbështet plotësisht protestën dinjitoze të minatorëve për punë dhe dinjitet. Por është shumë e qartë tashmë se sa kohë Edi Rama do të qeverisë, asnjë interes i qytetarëve nuk do të ruhet dhe asnjë shqetësim i shqiptarëve nuk do të marrë zgjidhje. Sepse Edi Rama aleancat e tij i ka shpallur prej kohësh që i ka me krimin dhe oligarkinë, por jo me qytetarët dhe aq më pak me minatorët dhe qytetarët e Bulqizës!”