Policia ka ndërmarrë një plan masash për bllokimin e disa akseve rrugore sot në kryeqytet për të siguruar mbarëvajtjen e derbit mes Partizanit dhe Tiranës.
Ndeshja pritet të zhvillohet në stadiumin “Air Albania” në orën 17:00, ndërsa ky plan masash pritet të vihet në zbatim një orë përpara.
“Masat e marra nga Policia e Tiranës konsistojnë në sigurimin e rendit dhe sigurisë publike, në të gjithë territoret jashtë stadiumit dhe në të gjitha rrugëkalimet. Policia kërkon mirëkuptimin e qytetarëve për kufizimin e qarkullimit të mjeteve nga ora 16:00 deri në përfundim të aktivitetit, në segmentet rrugore që do të jenë të bllokuara:
• Sheshi “Nënë Tereza”;
• Pjesë të segmentit të rrugës “Lek Dukagjini”;
• Rruga “Dervish Hima”;
• Përreth stadiumit “Air Albania” ;
• Do të kufizohen rrugëkalimet gjatë kohës së kalimit të tifozëve të Partizanit dhe Tiranës”, njofton policia, e cila po ashtu kërkon mirëkuptimin e tifozëve të Sport Klub Partizanit dhe Sport Klub Tirana që të zbatojë kërkesat e mëposhtme:
- Tifozët e Sport Klub Partizanit do të grumbullohen tek 21 Dhjetori dhe do të kalojnë në itinerarin për tek stadiumi “Air Albania” nga:
• 21 Dhjetori;
•ura “Vasil Shanto”;
•kryqëzimi i rrugës “Komuna e Parisit”,
• rruga “Sulejman Delvina”;
• Libri Univeristar;
• Presidenca drejt për tek COIN;
• Hyrjet tek tribuna N dhe E të stadiumit dhe anasjelltas; - Tifozët e Klub Sport Tirana do të grumbullohen te Teatri i Kukullave dhe do të kalojnë në itinerarin për tek stadiumi “Air Albania” nga;
• Ministria e Brendshme, Pedonalja;
•rruga “Xhorxh Bush”;
•Ura e Elbasanit, rruga e “Elbasanit”;
• Ambasada e SHBA-së;
• Kthim në rrugën “Dervish Hima;
• Kthim në rrugën “Sheh Ahmet Pazari”;
• Tribuna “S” dhe kthim anasjelltas;
Do të ushtrohen kontrolle ndaj tifozëve para hyrjes në stadium për sende të kundërligjshme (si armë apo lëndë piroteknike etj ). Çdo tifoz duhet të jetë i pajisur me dokument identifikimi. Nuk do të lejohen të futen në stadium fëmijët nën moshën 16 vjeç, pa praninë e prindërit apo kujdestarit.
Policia bën me dije se në rastet e prishjes së rendit dhe qetësisë publike do të ndërhyjë në ambientet e brendshme të stadiumit për rivendosjen e rendit dhe shoqërimin e shkelësve të ligjit në ambientet e Policisë për procedim penal apo administrativ.
Financuar Nga Bashkimi Europian
