Agron Shehaj: kandidati i 'shoqërisë', jo i partisë?

Mbarësia në biznes dhe paratë e kanë bindur se mund të ketë sukses kudo dhe mund të performojë në gjithçka. Nga kjo bindje nuk e tund asnjë dështim.

I pari në listën e Vlorës në vitin 2017, arriti rezultat jo të mirë, duke humbur një deputet dhe zgjeruar distancën në ‘votë popullore’ me kundërshtarin. Në këtë rast duhet marrë parasysh fakti se kishte Kryeministrin e vendit përballë.

Dështimi në Vlorë, ku u bë shpejt i njohur, e detyruan Bashën ta sjellë në kryeqytet, në Njësinë 5, atë zonë që njihet si ‘Stalingradi i Tiranës’, zonë e populluar kryesisht nga jugorë dhe pro-socialistë.

Atë që nuk realizoi dot në Vlorë, e arriti në Tiranë ku u bë kandidati i dytë më i votuar pas Bashës në parti. Shehaj bëri një fushatë publike, të kuruar mire, ndihmuar edhe nga xhepat e ngrohtë. Ajo që nuk eci mirë ishin raportet me eskponentët e tjerë të PD në zonë. Shumë prej tyre nuk ia duronin stilin e të bërit fushatë, përqendruar te ankesa se ndërkohë që ata mblidhnin vota për PD-në, Shehaj punonte për veten.

Turfulluesit në PD nuk e penguan, dhe rezultati serioz që arriti në zgjedhjet e 25 prillit, e shtynë të vedoste një gur në radhën për kreun e partisë.

Shehaj shpalli kandidaturën në një nga sallat e një hoteli luksoz në kryeqytet duke kritikuar Bashën dhe modelin e tij të drejtimit të PD.

I ardhur në PD nga ‘dritaret e Bashës’ ai po kërkon derën e tij dhe të PD, ku do të varë tabelën e biznesmenit të suksesshëm dhe njeriut të pavarur ekonomikisht.

Kjo e fundit, me sa duket, e bën të suksesshëm në shoqëri, por ende të papërqafuar në parti. Shehaj ka ndërmarrë disa aksione publike që e kanë bërë sipmatik në publik. Një ndër ta denoncimi i skandalit të Unazës së re, megjithëse këtë atribute e pretendojnë dy vetë në qytet. Një gazetar i vjetër thotë se është skupi i ekspozuar prej tij, ndërsa ish deputeti demokrat pretendon të kundërtën. Ka të tjerë që thonë se informacioni ishte siguruar nga PD, por Basha preferonte t’i nxirrte gështenjat nga zjarri me duart e të tjerëve, duke mos u futur kështu drejtpërdrejt në përplasje me njerëz të fuqishëm të botës së biznesit.

Sido që të jetë kjo i dha Shehajt pamjen e një kalorësi që lufton për interesin publik. Deputeti vlonjat e imagjinon shpesh veten në kalë duke luftuar beteja të lavdishme, por jo rrallë rrëzohet në pluhurin e zhgënjimeve.

Një inkursion me besim të madh pati marrë ai në shtator 2018, kur u nis drejt Veriut për të rindezur zjarrin e një beteje të kuksianëve me qeverinë Rama. Çfarë pa dhe çfarë dëgjoi e bënë të kuptonte se zjarret ndizen dhe fiken në Tiranë, dhe duan dy duar nga trupa të ndryshëm.

Meqë labi brenda vetes nuk ia lejon, ai nuk u dorëzua, edhe pse u shkurajua.

Shkurajimin nuk ua lejon as ideve të veta. Në fushatën për kryetar të PD, duke kritikuar Bashën thotë se ka qenë kundër djegies së mandative. Ndërkohë që klipet televizive, me zë dhe figurë e tregojnë duke thënë gjë tjetër.

Shehaj nuk është politikisht i qartë për platformën e tij për PD, e cila është një kombinim idesh populiste dhe tezash idealiste, mbrujtur me gjuhë OJF-sh që huazojnë nga leksiku i Perëndimit, jo nga brenda realitetit.

Pa asnjë tezë radikale, vetëm ato që kanë të bëjnë me çështje të procedurës së brenndshme, si për shembull sa rri dhe kur ikën kryetari i partisë, atij i duhet të shfaqet si maverick politik më shumë se si ‘djali i mirë’.

Në këtë rrafsh ai duket sikur risjell ndryshimin Berisha-Basha, ku i pari ishte përbindëshi politik dhe i dyti ‘the good boy’ që normalizonte imazhin e PD. Tetë vjet më vonë është kuptuar se e vetmja arritje është ‘normalizimi i humbjes’.

Në këtë pikë Shehaj nuk ndryshon nga kandidatët e tjerë, të cilt janë gjithashtu joradikalë. Të gjithë ecin duke u mbajtur në telin e hollë ku u duhet të konsiderojnë Berishën dhe trashëgiminë e tij në PD, amerikanët, bazën radikale të partisë dhe një shoqëri të deradikalizuar.

Në gjithë këtë vorbull politiko-shoqërore Shehaj i ngjan peshkut drejtimhumbur, por duhet thënë se çështja e tij nuk është e tillë.

Basha mund të prodhojë me anë të tij një anti-kandidat, që e lejon të mos ngjajë si një Berishë që ka prirjen e kontrollit, por jo mjeshtërinë e përpunimit të tij.

Shehaj nga ana e vet mund të marrë numrin 2 apo 3 të partisë në më pak kohë se sa kishte ëndërruar para katër vjetësh kur u fut në listën e Vlorës.

Sa i takon kurrikulumit personal e shoqëror, Agron Shehaj u lind në qytetin e Vlorës, dhe rrjedh prej një familjeje patriotike të zonës.  Eshtë i martuar dhe ka dy fëmijë.

Shehaj është larguar nga Vlora bashkë me familjen në moshën 13 vjeçare, në vitin 1991.

Në Bolzano ka kryer studimet e mesme, dhe në Firence ato të larta për Ekonomi. Një periudhë 12 mujore, pas përfundimit të gjimnazit, e ka kaluar në Shtetet e Bashkuara të Amerikës.

Në vitin 2005, Shehaj vendos të kthehet në Shqipëri, në një vendim që ai e konsideron si 'thirrja e vendit tim'.

Ai është President i IDS, kompanisë më të madhe të telemarketingut në Shqipëri, me filiale në qytetet kryesore të vendit: Tiranë, Vlorë, Fier, Durrës, Lushnjë dhe Elbasan.

Shehaj, vitet e fundit është investuar në botën digjitale, ku ka tashmë 5 kompani, të cilat operojnë në disa qytete të Italisë dhe në Londër.

Ai është bashkëthemelues i një shoqate shqiptare në Bolzano të Italisë.

Në Tiranë është sponsor i 'Spartakut', një skuadre fëmijësh të cilët nuk kanë mundësi të paguajnë për klasa futbolli.

Agron Shehaj vjen nga shtresa e të persekutuarve politikë dhe është i ndjeshëm ndaj krimeve të komunizmit. Për këtë ka ngritur dhe financon portalin “kujto.al” që sjell në vëmendje kujtimet e të dënuarve politikë, krimet makabre në burgjet dhe kampet e komunzimit.

Për aktivitetin ekonomik të Agron Shehajt kanë shkruar disa media të huaja, ndër to italianet 'Corriere della sera', 'L'Espresso', Rai Uno, 'la Repubblica', dhe gjermania 'Der Speigel'.

Gjatë pandemisë, Agron Shehaj, ka dhuruar dy pajisje respiratore dhe një dialize për dy spitalet që trajtonin të sëmurës me COVID-19 në Shqipëri.

Një tjetër gjest human i tij, është dhurimi i pages së deputetit për 6 motrat jetime në Kukës.

Shehaj është gjithashtu donator i përhershëm i shoqatës Doën Syndrome Albania, nismë së cilës iu fut pasi e bija e një mikut të afërt u lind me sindromën doën.

I investuar edhe në fushën e Kulturës, Agron Shehaj është bashkëthemelues, me Uran Butkën, i Institutit të Studimeve Historike 'Lumo Skëndo'.

Shehaj është dhe financuesi i kthimit të eshtrave në Shqipëri, të mendimtarit dhe aktivistit të njohur nacionalist, Mid’hat Frashëri.