Sfidat e doktorit në 78-vjetorin e ‘dy stinëve’

Sali Berisha feston sot 78-vjetorin e tij të lindjes.

Kjo ditëlindje e gjen ‘doktorin’ mes  sfidave të shumta, me zhvillime të forta si brenda kampit opozitar  ashtu edhe në përballjen mes kundërshtarëve politik.

Në këtë ditëlindje, Berisha shfaqet në formë dhe i përgatitur siç shkruan vetë në një postim në Facebook, për një pranverë të re politike.  

“Sot 78 vjeç! Udhëtoj njëheras në dy stinë. Në vjeshtën e bukur të jetës dhe, në një pranverë të re politike! Lavdi Zotit! Mirënjohje të pakufishme familjes time dhe të gjithëve ju miq”, shkruan Berisha.

Sfidat

Berisha njihet si një nga figurat më të rëndësishme politike të vendit. Ka qenë dy herë president, dy herë kryeministër, udhëheqës i Partisë Demokratike për më shumë se 16 vjet.

Drejtimi i PD

Kjo ditëlindje e gjen Berishën mes shumë sfidash, me një PD ende të ndarë në dy “pole”, ku një pjesë mbështesnin Berishën e një pjesë Enkelejd Alibeajn, të cilit Lulzim Basha i la drejtimin e partisë pas dorëheqjes së tij në mars të këtij viti. 

Megjithatë, këtë javë u dhanë sinjale pozitive për negociata me qëllim bashkimin e plotë të PD dhe daljen e tyre me një kandidat të përbashkët në zgjedhjet vendore.

Ndërkohë, në datë 3 nëntor gjykata e Apelit do të shqyrtojë ankimimin e Partisë Demokratike, kundër vendimit të marrë nga gjykata më 18 mars 2022, kur regjistroi ndryshimet statutore të Kuvendit të PD-së të 17 korrikut 2021.  

Zgjedhjet vendore

Zgjedhjet vendore 2023, janë një tjetër mision i rëndësishëm në axhendën politike të Berishës.  

Primaret që u zhvilluan në PD, Sali Berisha, kreu i kësaj force politike, do t'i ketë model edhe në zgjedhjet lokale.

Këto zgjedhje shihen me mjaft interes për opozitën pasi në vitin 2019 PD nuk u kandidoi asnjë emër në zgjedhje duke i bojkotuar.

Protestat

Një vjeshtë protestash ka paralajmëruar Berisha. Dy ditë më parë, i ftuar në Opinion, Berisha tha se së shpejti priten protesta kombëtare, që Shqipëria nuk i ka parë kurrë.  

Berisha nuk dha një datë konkrete, por tha se po shqyrtohet ende teknika dhe forma e tyre.

Non grata

Pas SHBA, Berisha u shpall ‘non grata’ edhe nga Britania e Madhe. Ai ka akuzuar ambasadorin britanik në Tiranë për atë që ai e quajti një akt korruptiv dhe ka hedhur poshtë pretendimet e ngritura lidhur me Damir Fazllic dhe Fation Dautin. Për këtë, Berisha ka pohuar se i është drejtuar gjykatës.