Skandalet që shoqëruan dy vitet e Muhamet Rrumbullakut në krye të Policisë së Shtetit

Muhamet Rrumbullaku ka dhënë dorëheqjen si drejtuesi i policisë së shtetit, pas dy vitesh në këtë detyrë.

Rrumbullaku u emërua si drejtori i Përgjithshëm i Policisë së Shtetit pas vendimit të qeverisë më 7 shtator 2022, emërim ky që erdhi pas shkarkimit të ish-drejtorit Gledis Nano. Ai u hoq me argumentin se nuk i realizoi objektivat.

Dorëheqja e tij vjen në një kohë kur Policia e Shtetit është në fokus për shkak të shumë ngjarjeve të rënda kriminale të ndodhura në muajin gusht, trafikut të drogës dhe krimit të organizuar etj.

Vdekja e Egli Progës

Kjo verë pati debate dhe reagime të shumta lidhur me vdekjen e Egli Progës në Pogradec.

Familjarët ngritën pretendime për tetativë të fshehjes së ngjarjes nga ana e Policise se Pogradecit, për veprim të ngadaltë të Policisë.

Gjithashtu ata ngritën edhe pretendimin se ambulanca eshte vonuar 30 minuta.  Nga aga tjetër, Kreu i Policisë së Shtetit, Muhamet Rrumbullaku mori në mbrojtje punonjësit e komisiariatit të Pogradecit dhe sulmoi mediat dhe gazetarët për “fabrikime dhe akuza të neveritshme në adresë të Policisë së Shtetit” lidhur me pikëpyetjet e ngritura mbi vdekjen tragjike të 42-vjeçarit Proga si pasojë e dhunës së ushtruar mbi të më 10 gusht në qytetin e Pogradecit.

Rrumbullaku shkoi edhe më tej, duke pohuar se struktura të Policisë po hulumtonin rrjetet sociale dhe po përgatisnin kallëzime penale në raport me “këtë dizinformim të qëllimtë e keqdashës ndaj Policisë së Shtetit”.

Egli Proga, baba i dy fëmijëve u dhunua pasditen e 10 gushtit ndërsa po punonte në një lokal të marrë me qira. Policia arrestoi Denis Meçen, 29 vjeç për krimin, por ai po përballet me gjykatën me akuzën e vrasjes nga pakujdesia. Tre persona të tjerë u ndaluan për moskallëzim krimi dhe veprime që pengojnë zbulimin e së vërtetës.

Skandali në TIMS

Skandali me të dhënat sensitive të shtetasve shqiptarë e jo vetëm ishte një tjetër moment që theksoi më shumë dritëhijet e Rrumbullakut në krye të Policisë.

Komisioni parlamentar I ngritur dhe I drejtuar nga Ervin Salianji kërkoi të hetohen ndërhyrjet në sistemin Tims. Lidhur me këtë debat,  Gjykata e Tiranës me kërkesë të Prokurorisë la në arrest shtëpie ish-drejtorin e Teknologjisë dhe Informacionit në Policinë e Shtetit, Ervin Muça, i akuzuar për veprën penale “Hyrje e paautorizuar kompjuterike”.

Ai dyshohet se ka kopjuar pa autorizim të dhënat e sistemit Tims, por vetë Muça ka mohuar të ketë shkelur ligjin.

Drejtori i policisë është vënë në dijeni përmes një emaili nga një punonjës i IT, se informacionet e TIMS po merreshin me urdhër të shefit të ri Ervin Muça në një hard-disk të jashtëm, gjë që ndalohet nga ligji i Policisë së Shtetit.

Pas marrjes në dijeni, Rrumbullaku pezulloi vetëm për pak ditë nga puna Ervin Muçën dhe më pas e riktheu atë në detyrë, ku qëndroi për gati një vit deri në momentin që gjykata vendosi masën ‘arrest në shtëpi’ ndaj tij.

Ishte ambasada e SHBA e para që njoftoi ndërhyrjet, ndërsa më pas u pranua se një punonjës ka marrë të gjitha të dhënat. Amerikanët janë të shqetësuar për diplomatët dhe njerëzit e tyre dhe duket se tani janë angazhuar dhe në nivel ekspertësh për të parë se çfarë ka ndodhur.

Çeshtja ‘Martinaj’

Fillimisht Rrumbullakut kur u prezantua në detyrë, iu kërkua nga Kryeministri Rama të zbardhte të vërtetën mbi fatin e Ervis Martinaj, kërkesë që nuk u plotësua, veç deklaratave shablon, “hetimet vazhdojnë”.