"Keni shpërfillur të rinjtë", Soreca kritika partive: Fushata të përqendrohet te debatet, programet dhe reformat

"Ka qenë një fushatë plot me ngjarje dhe e nxehtë, por deri tani kemi parë pak debate dhe shumë pak propozime politike kushtuar rinisë" Kështu ka deklaruar ambasadori i Bashkimit Europian në Shqipëri, Luigi Soreca gjatë konferencës #UnëVendos mbi pritshmëritë e të rinjve dhe zgjedhjet.

Sipas tij, rinia shqiptare përfaqëson 40% të popullsisë dhe duhet të jenë në qendër të fushatës dhe manifesteve të partive. Pavarësisht deklaratat të kryetarëve të partive, Soreca tha se këtë vit ka më pak të rinj të futur në listat e kandidatëve për deputet, krahasuar me zgjedhjet e kaluara të vitit 2017. Ndër të tjera, Soreca u bëri thirrje politikanëve që t’i dëgjojnë vërtet të rinjtë shqiptarë dhe t'i përfshijnë ata në procese të vërteta të vendimmarrjes.

Diplomati europian deklaroi se po pret me padurim që java e fundit e fushatës elektorale të përqendrohet te debatet, programet politike dhe reformat.

Fjala e plotë e ambasadorit të BE-së Luigi Soreca-s:

Shqipëria ndodhet tani pothuaj një javë para zgjedhjeve. Ka qenë një fushatë plot me ngjarje dhe e nxehtë, por diçka e rëndësishme duket se mungon. Deri tani kemi parë pak debate dhe shumë pak propozime politike kushtuar pjesës më të rëndësishme dhe më të gjallë të shoqërisë shqiptare: të rinjve të saj. Të rinjtë shqiptarë përfaqësojnë pothuajse 40% të popullsisë. Ata janë e ardhmja e këtij vendi dhe janë qytetarë të ardhshëm të Bashkimit Evropian. Ata duhet të jenë në qendër të fushatës dhe manifesteve të partive. Përkundrazi, të rinjtë ndihen të shpërfillur dhe të harruar. Ka hulumtime të shumta që tregojnë se ata janë më pak të prirë për të votuar në krahasim me grupmoshat më të vjetra. Dhe këtë vit, ka edhe më pak prej tyre në listat e kandidatëve të partive, krahasuar me zgjedhjet parlamentare shqiptare të katër viteve më parë. Të rinjtë shpesh thuhet se nuk merren me politikë, sepse nuk kanë interes. Kjo nuk është ajo që kam parë në Shqipëri. Kam takuar kaq shumë të rinj shqiptarë që janë aktivë, të përkushtuar dhe plot iniciativa qytetare. Kaq shumë të rinj që punojnë vullnetarisht dhe janë të përkushtuar për të ndihmuar komunitetin e tyre. Kur mbërrita në Shqipëri, unë vendosa si përparësi timen të angazhoja dhe të fuqizoja rininë e Shqipërisë. Angazhimi kryesor i Javës sime të parë të Evropës, në vitin 2019, i kushtohej “Fuqisë së Rinisë”. Të rinjtë shqiptarë janë lodhur nga të tjerët që flasin në emër të tyre. Në vend që të flasim për ta, ne deshëm të krijonim hapësirë​​që ata të paraqesin shqetësimet dhe aspiratat e tyre të vërteta, me fjalët e tyre, pa ndërmjetësim. Ne duhet t’i mbështesim që të flasin vetë.

Kjo është arsyeja pse po e zhvillojmë këtë veprimtari sot. Për t’u dhënë të rinjve hapësirë ​​për të artikuluar kërkesat dhe pritshmëritë e tyre ndaj zgjedhjeve, ndaj politikanëve të tyre, por edhe ndaj nesh, Bashkimit Evropian. Po ju tregoja për të rinjtë fantastikë që takoj në Shqipëri. Sot do të njiheni me disa prej tyre. Ata quhen “Ambasadorët e Rinj Evropianë” dhe siç e keni parë në videon “Hera ime e parë”, janë plot energji, iniciativë dhe argëtim. Ambasadorët e Rinj Evropianë kanë qenë në të gjithë vendin në javët e fundit, duke zhvilluar takime dhe seminare me të rinj. Sot ata do të përshkruajnë gjetjet e tyre, si dhe do të paraqesin 10 kërkesat që u drejtojnë partive politike. Në këto kohëra të jashtëzakonshme të një pandemie globale, të rinjtë në Shqipëri janë prekur në mënyrë joproporcionale, ashtu si kolegët e tyre në vendet e tjera. Kjo situatë ka ndikuar mundësitë, vendet e punës, arsimimin dhe kënaqësitë e tyre në jetë. Kjo është edhe një sfidë tjetër që autoritetet shqiptare duhet ta trajtojnë pas zgjedhjeve me përparësinë më të lartë, përndryshe kjo ndjenjë e ndarjes mes brezave do të nxisë edhe më shumë shtytjen për të kërkuar kushte më të mira jetese diku tjetër - siç ndodh shumë shpesh këtu për rininë shqiptare. Është e qartë se në Shqipëri, por edhe në Bashkimin Evropian, veprimi më i ngutshëm është përgjigjja ndaj thirrjes për gjithëpërfshirje që po vjen nga brezi i ri. Të mos lejojmë që të jetë një thirrje e humbur. Është pikërisht koha që zërat e tyre të dëgjohen, sepse, më 25 prill, vendosin ata!

Dëgjuam shumë ide të mira dhe diskutuam disa probleme kyçe sot. Siç e thashë në fillim, më të vjetrit nuk duhet të flasin në emër të të rinjve. Shpesh, ne ngatërrojmë përvojën me të vërtetën universale. Dhe priremi të diktojmë. Shpresoj se sot kemi arritur të bëjmë të vetmen gjë që ne të tjerët mund të bëjmë në këtë kontekst: t’i lemë ata të flasin, t'i dëgjojmë, të mbajmë shënime dhe t’i ndjekim. U bëj thirrje edhe njëherë politikanëve që t’i dëgjojnë vërtet të rinjtë shqiptarë, t'i përfshijnë ata në procese të vërteta të vendimmarrjes. Do të doja t’i shihja politikanët në këtë javë të fundit të fushatës që të pranojnë sfidën dhe të japin propozimet e tyre për kërkesat e paraqitura sot. Unë gjithashtu do të doja të njoftoja se ky dialog me të rinjtë e Shqipërisë do të vazhdojë pas zgjedhjeve. Gjatë 3 javëve të Javëve të Evropës në maj, sërish pjesa më e madhe e programit i kushtohet takimit me të rinjtë në të gjithë vendin. Dhe mua do të më shoqërojnë Ambasadorët tanë të Rinj Evropianë. Nga veriu në jug të Shqipërisë, ne do të shkojmë në bashkitë ku shkojmë rrallë, për të zhvilluar aktivitete në shkolla, universitete, me grupe rinore dhe organizata të shoqërisë civile. Vazhdoni të na ndiqni. Do të mbërrijë shumë shpejt në qytetin tuaj!

Së fundi, një javë para zgjedhjeve, dëshiroj të rikujtoj thelbin e deklaratës së përbashkët të BE-së dhe Shteteve Anëtare, që e publikuam ditën e parë të fushatës:

Ne po presim me padurim që java e fundit e fushatës elektorale të përqendrohet te debatet, programet politike dhe reformat. Ne i mirëpresim dhe i mbështesim përpjekjet e organizatave të shoqërisë civile shqiptare për të vëzhguar Ditën e Zgjedhjeve. Ne mbështesim përgatitjen dhe zhvillimin e zgjedhjeve, veçanërisht përmes misionit të ODIHR-it. Delegacioni i BE-së dhe shumë ambasada të Shteteve Anëtare të BE-së do të vizitojnë gjithashtu një numër të madh vendvotimesh në Ditën e Zgjedhjeve, në kontekstin e dislokimit të vëzhguesve tanë. Më shumë se 80 përfaqësues, në 40 ekipe, do të jenë të pranishëm në terren, duke mbështetur punën e ndërmarrë nga vëzhguesit afatgjatë të Misionit të ODIHR-it. Unë i nxis qytetarët e rinj (dhe jo aq të rinj) të Shqipërisë që të ushtrojnë të drejtën e tyre për të votuar, duke respektuar të gjitha masat kundër pandemisë COVID-19.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm