Policia e Kukësit njoftim zyrtar për Abedin Oruçin: 6 të arrestuar dhe 5 të proceduar

Policia e Kukësit ka dhënë informacion zyrtar në lidhje me ngjarjen e ndodhur ditën e djeshme ku mbetën të lënduar 5 policë gjatë operacionit për arrestimin e ish-kryetarit të Qarkut të Kukësit, Abedin Oruçi.

Sipas njoftimit të policisë, kur efektivët kanë mbërritur në lokalin në pronësi të Abedin Oruçi, persona të afërm të tij janë përplasur fizikisht me punonjësit e Policisë.

Ndërkohë, Oruçi ka nxjerrë armën dhe ka kërcënuar efektivët dhe më pas është larguar. Për këtë ngjarje, kanë rënë në pranga 6 personat të cilët u përplasën fizikisht me policët.

Të arrestuarit janë;  E. O., 32 vjeç, G. O., 34 vjeç, B. M., 35 vjeç, E. M., 18 vjeç, Z. Sh., 19 vjeç dhe B. D., 48 vjeç, banues në Kukës,  këta shtetas akuzohen për veprat penale “Kundërshtimi i punonjësit të policisë së rendit publik” kryer në bashkëpunim dhe “Veprime që pengojnë zbulimin e së vërtetës”.

Po ashtu, janë proceduar në gjendje të lirë, për veprën penale “Mosbindja ndaj urdhrit të punonjësit të policisë së rendit publik”, shtetasit: R. S., 22 vjeç, A. S., 18 vjeç, G. O., 50 vjeç, I. O., 28 vjeç dhe R. S., 21 vjeç, banues në fshatin Mamez dhe në Kukës.

Tashmë së bashku me Abedin Oruçin, policia ka shpallur në kërkim dhe një person tjetër të identifikuar me inicialet P. O., 46 vjeç, banues në Kukës.

Njoftimi i plotë:

Kukës-Efektivët e Drejtorisë Vendore të Policisë Kukës, në zbatim të planit operacional për kapjen e shtetasit në kërkim Abedin Oruçi, pas informacioneve të siguruara në rrugë operative, ditën e djeshme kanë organizuar punën dhe shkuar në ambientin e lokalit në pronësi të tij.

Në momentin që punonjësit e Policisë kanë hyrë brenda ambientit, persona të afërm të këtij shtetasi janë konfrontuar fizikisht me punonjësit e Policisë.

Shtetasi Abedin Oruçi, duke përfituar nga ky fakt dhe duke i kanosur me armë zjarri punonjësit e Policisë, ka mundur të largohet.

Në përfundim të veprimeve procedurale në lidhje me ketë ngjarje, u arrestuan në flagrancë të shtetasit:

-E. O., 32 vjeç, G. O., 34 vjeç, B. M., 35 vjeç, E. M., 18 vjeç, Z. Sh., 19 vjeç dhe B. D., 48 vjeç, banues në Kukës, për veprat penale “Kundërshtimi i punonjësit të policisë së rendit publik” kryer në bashkëpunim dhe “Veprime që pengojnë zbulimin e së vërtetës”.

U proceduan në gjendje të lirë, për veprën penale “Mosbindja ndaj urdhrit të punonjësit të policisë së rendit publik”, shtetasi

-R.S., 22 vjeç, A. S., 18 vjeç, G. O., 50 vjeç, I. O., 28 vjeç dhe R. S., 21 vjeç, banues në fshatin Mamez dhe në Kukës.

Gjithashtu, janë shpallur në kërkim policor shtetasit Abedin Oruçi, 54 vjeç dhe P. O., 46 vjeç, banues në Kukës. Materialet i kaluan Prokurorisë së Rrethit Gjyqësor Kukës, për veprime të mëtejshme