Zgjedhjet në Shqipëri, media franceze: Test vendimtar për anëtarësimin në BE mes ndasive të thella

Zgjedhjet parlamentare në Shqipëri që po zhvillohen në një atmosferë të polarizuar, me kryeministrin Edi Rama që kërkon një mandat të katërt dhe rivalin e tij Sali Berisha që synon rikthimin në pushtet pas 12 vitesh në opozitë kanë marrë vëmendjen edhe të mediave të huaja. 

Radio France Internationale (RFI) ka publikuar sot një analizë të thellë ku thekson se zgjedhjet në Shqipëri janë një test vendimtar për anëtarësimin në BE
Sipas RFI, këto zgjedhje shihen si thelbësore për vlerësimin e zhvillimit demokratik të vendit dhe përparimit të tij drejt objektivit për një të ardhme evropiane.

Shkrimi i plotë: 

Zgjedhjet e sotme përballin Kryeministrin Edi Rama me rivalin e tij të kahershëm, Sali Berisha, një politikan i djathtë që drejton një aleancë të partive opozitare.

Rama, 60 vjeç, është lideri i Partisë Socialiste që prej vitit 2005 dhe kërkon një mandat të katërt radhazi, duke premtuar anëtarësimin e Shqipërisë në Bashkimin Evropian deri në vitin 2030.

Berisha, 80 vjeç, synon të rikthehet në pushtet pas 12 vitesh në opozitë.

Koalicioni i ish-presidentit ka miratuar slloganin në stilin e Donald Trump – "Shqipëria e Madhe", dhe po zhvillon fushatën e tij mbi rilindjen ekonomike.

"Ne jemi të vetmit që mund ta ringjallim ekonominë e vendit, të vetmit që mund ta çojmë Shqipërinë përpara. Edi Rama po numëron ditët e fundit të regjimit të tij," deklaroi Berisha.

Disa nga arkitektët e fushatave presidenciale të Donald Trump janë ribashkuar në Shqipëri për të ndihmuar fushatën e Sali Berishës.

Ata përfshijnë Chris LaCivita, i cili shërbeu si bashkëdrejtues i fushatës së suksesshme të Trump në vitin 2024; Tony Fabrizio, sondazhuesi i kahershëm i Trump; dhe Paul Manafort, ish-kryetar i fushatës së Trump në vitin 2016 – para se të dënohej në vitin 2018 për krime që përfshinin lobim të fshehtë për ish-presidentin pro-rus të Ukrainës.

“Është e vetmja Parti Demokratike për të cilën do të merrja ndonjëherë në konsideratë të punoja,” tha me shaka Chris LaCivita, teksa u nis drejt Shqipërisë për udhëtimin e tij të tretë përpara zgjedhjeve të së dielës.

Sali Berisha, i cili shpreson që administrata e re amerikane të shfuqizojë sanksionet që i ndalojnë hyrjen në Shtetet e Bashkuara, ka nënshkruar gjithashtu një kontratë dyvjeçare prej 6 milionë dollarësh me Continental Strategy, një firmë republikane për konsulencë dhe lobim.

Në fund të një fushate të shënuar nga konfrontimi, veçanërisht në rrjetet sociale, sondazhet e fundit tregojnë një fitore për partinë e Ramës.

Ndërkohë, Organizata për Siguri dhe Bashkëpunim në Europë (OSBE) ka deklaruar se ka një “polarizim ekstrem politik” në këtë vend ballkanik me 2.8 milionë banorë.

Berisha akuzon Socialistët për “blerje votash, frikësim të votuesve, presion, përdorim të fondeve publike nga ministrat dhe kandidatët e mazhorancës për fushatën e tyre zgjedhore” – pretendime që Rama i ka hedhur poshtë si “thjesht një justifikim për humbjen.”

Votat e diasporës
Për herë të parë në historinë e zgjedhjeve në Shqipëri, diaspora mund të votojë nga jashtë me postë. Kjo po shihet si një provë për zhvillimin e proceseve dhe institucioneve demokratike, në kontekstin e negociatave për anëtarësim në BE, që kanë nisur në vitin 2022.

Sipas të dhënave zyrtare nga Komisioni Qendror i Zgjedhjeve, 245,935 shqiptarë që nuk janë rezidentë në Shqipëri janë regjistruar për të votuar.

"Shqipëria ka bërë përparim të rëndësishëm në rrugën drejt anëtarësimit në BE, duke dëshmuar këmbënguljen e saj në zbatimin e reformave ambicioze për përfitimin e qytetarëve të saj," deklaroi Silvio Gonzato, ambasadori i delegacionit të BE-së në Shqipëri, për agjencinë franceze të lajmeve AFP.

Humbësit kanë kundërshtuar rezultatet e çdo zgjedhjeje që nga rënia e komunizmit në fillim të viteve 1990, duke pretenduar për manipulim.

Këtë herë, votimi po monitorohet nga afër dhe, për herë të parë, në proces do të përfshihen nëpunës civilë dhe zyrtarë të drejtësisë, së bashku me komisionin zgjedhor dhe rreth 300 vëzhgues ndërkombëtarë.

Për Brukselin, votimi i së dielës është një provë e madhe për Shqipërinë, e cila është anëtare e NATO-s që prej vitit 2009.

“Organizimi i zgjedhjeve të lira dhe të ndershme, në përputhje me normat dhe vlerat demokratike, do të jetë një hap thelbësor për forcimin e demokracisë shqiptare, rritjen e besimit të qytetarëve tek përfaqësuesit e tyre të zgjedhur dhe avancimin e integrimit evropian të vendit,” tha Gonzato.

Pesë ditë pas zgjedhjeve, Tirana do të presë samitin e Komunitetit Politik Evropian, një forum ndërqeveritar për diskutimin mbi të ardhmen e Evropës – i themeluar në vitin 2022 pas pushtimit rus të Ukrainës, me nismën e presidentit francez Emmanuel Macron.