Raportuesi për Kosovën në Parlamentin evropian do të jetë Peter Beyer. Kështu vendosi sot Komiteti për Çështje Politike i Asamblesë Parlamentare të Këshillit të Evropës.
Në Kosovë procesi i përzgjedhjes u ndoq me vëmendje, ndërsa institucionet vendase i trembeshin faktit se mos këtë detyrë e merrte Aleksei Kondratev, i cili akuzohet për lidhje të forta me Rusinë.
Autoritetet në Kosovë e kishin bërë të qartë se do të refuzonin çdo bashkëpunim me të nëse do të zgjidhej. Ndërkohë, mbi 40 organizata të shoqërisë civile në Kosovë i bënë thirrje Asamblesë Parlamentare dhe Komitetit për Çështje Politike që të mos ta emëronin atë në këtë detyrë.
Në mediat kosovare u shkrua madje se Kondratev ishte përfshirë në një incident në Kosovë në vitin 2001, kur shërbente si pjesë e kontingjentit rus në kuadër të forcave paqeruajtëse ndërkombëtare.
Ndërkohë, raportuesi i ri për Kosovën, Peter Beyer është deputet i parlamentit gjerman nga radhët e demokristianëve të kancelares Angela Merkel.
Ai njihet për qëndrimet e tij kundër ndryshimit të kufijve të Kosovës dhe ka bërë thirrje më parë , që Bashkimi Evropian të emërojë një të dërguar të posaçëm për bisedimet Kosovë – Serbi.
Financuar Nga Bashkimi Europian
