Presidenti Ilir Meta ka firmosur kallëzimin penal ndaj Kryetarit të Këshillit të Emërimeve në Drejtësi, Ardian Dvorani.
Televizionet informative raportojnë se presidenti ka vendosur tu drejtohet 3 prokurorive për këtë kallëzim penal: Prokurorinë e Përgjithshme, Prokurorinë e Tiranës dhe Prokurorinë e Shkallës së Parë për Krimet e Rënda.
Këto kallëzime nuk do ti depozitojë Ilir Meta, por këshilltarët e tij, të cilët do të çojnë në prokurori materiale voluminoze që tregojnë shkelje të Dvoranit, sikurse pretendon zyra e Presidencës.
Dvorani është kthyer në qendër të akuzave për ngërçin në Gjykatën Kushtetuese. Sipas Metës ai ka shkelur rëndë ligjin për emërimin e anëtarëve të kësaj gjykate. Po ashtu kreu i shtetit ka thënë se disponon video me shkelje të rënda të Dvoranit.
Nga ana e tij presidenti Meta ka konfirmuar se sapo nënshkroi padinë ndaj Dvoranit, përmes një shënimi në Facebook.
“Të dashur qytetarë!
Sapo nënshkrova kallëzimin penal të premtuar ndaj Kryetarit të Këshillit të Emërimeve në Drejtësi, z.Ardian Dvorani.
Si President i Republikës, po i jap një mundësi historike Reformës në Drejtësi, për të treguar integritetin dhe vërtetësinë e saj”, shkruan Meta.
Discussion about this post