Ndërroi jetë një orë pas lindjes, reagon spitali për rastin e 25-vjeçares

25-vjeçarja Rexhina Debrova ka ndërruar jetë në spitalin e Elbasanit një orë pas lindjes. Qendra Spitalore në Elbasan ka reaguar pas vdekjes së të resë, duke thënë se iu dha trajtimi i duhur por dyshohet se ajo ka pësuar një komplikacion postoperator trombemboli pulmonare, e cila i solli edhe vdekjen.

Deklarata e plotë:

“Duke shprehur ngushëllimet familjarëve për humbjen e 25-vjeçares R. D., Spitali rajonal Elbasan sqaron opinionin publik ne lidhje me humbjen e jetës së 25-vjeçares” si vijon: Pacientja R. D. u paraqit në spital më datë 22.04.2019 në orën 10:25 paradite.

Pacientja ka ardhur me urgjencë në spital, me barrë të vonuar 42-javëshe dhe është futur në sallë, ku mjekët asistuan lindjen e fëmijës, i cili erdhi në jetë në orën 11:50.

Foshnja u reanimua dhe gëzon shëndet të mirë.

Stafi mjekësor ka dhënë trajtimin e duhur mjekësor, por nëna e re dyshohet se pësoi komplikacion postoperator trombemboli pulmonare, e papajtueshme me jetën.

Aktualisht priten rezultatet e ekspertizës mjeko-ligjore për shkakun e vdekjes së nënës”, deklaron spitali.