Nikoll Lesi provokon Edi Ramën me foton me hundë të thyer: Njeriu i lindur nga media, konvertohet në anti-media

Botuesi i gazetës ‘Koha Jonë’ ka provokuar kryeministrin Edi Rama duke ripublikuar një foto të shkrepur më 1997 ku pretendohet se u dhunua nga SHIK-u.

“Në foto: Edi Rama, bashkëpunëtor i gazetës “Koha Jone”, masakruar nga SHIK-u i Bashkim Gazidedes dhe Visho Ajazit me 23 janar 1997, pas disa artikujve në “Koha Jone”, shkruhet në foton që shoqëron artikullin me titull: “Edi Rama, njeriu i lindur nga media, konvertohet në anti-media”.

Lesi i drejton edhe dy pyetje kryesore Ramës, i cili deklaroi dje në emisionin ‘Studio e Hapur’ se publiku nuk më besim te mediat.

-Zoti kryeministër pse nuk rrini larg disa pronarëve të mediave, të cilët shfrytëzojnë privatisht pushtetin tënd ekzekutiv, duke e përdorur median për të mikluar e makiazhuar imazhin tuaj si politikan?

-Pse nuk pranoni të përballeni me emra të botës mediatike si; Andi Bushati, Mero Baze, Ylli Rakipi, Armand Shkullaku, Skënder Minxhozi, Andi Bejtja, Robert Rakipllari, Adrian Thano, Mark Marku, Mustafa Nano, Anila Basha, Lorenc Vangjeli, Adi Krasta e disa të tjerë, por u mbyllni derën?

“Janë dhe një mori pyetjesh të tjera zoti kryeministër për raportet tuaja me mediat, por duhet të pranoni se nuk jeni njeri jashtë interesave të pushtetit të medias, përderisa darkon me disa pronarë mediatikë të cilët të rrinë afër për interesa private, e jo për interesa të publikut. Ka një fjalë të urtë popullore që thotë se; një njeri mund të njihet më mirë kur ndodhet majë pushtetit e jo kur është në opozitë, apo pa asnjë lekë siç ishte kur vinte nga Parisi, dikur”, shkruhet në fund të artikullit të ‘Koha Jonë’.