OP-ED

Policia që (NUK) duam

Policia që (NUK) duam

‘Policia është me ne’, ka qenë një parullë që hidhej mitingjeve të para në vitet ‘90. Ishte një grishje për uniformat blu, një thirrje uniteti dhe ndarjeje. U kërkonte policëve që të shkëputeshin nga pushteti i kohës dhe të bashkoheshin me popullin, që është i pakohë.

Ishin epoka të tjera, kur thirrje të tilla, mbushur me romantizëm, edhe kishin kuptim. Sot e 30 vjet më vonë, kur kemi folur për demokratizim, depolitizm, profesionalizim e plot -izma të tjerë, Policia duket se i është larguar thirrjes për të qenë me ne dhe është futur në një slogan tjetër: ‘Policia që duam’.

Kemi kaluar nga romantika e viteve ‘90 te racionalja e vitve ‘20 të shekullit vijues. Nuk janë sofistikuar vetëm parullat, por edhe uniformat, kërkesat ndaj tyre. Kështu, për ‘barkun e madh të policëve’ është folur shpesh, por shumë pak për babëzinë e korrupsionit. Për një polici europiane është ngritur dollia, por për kontrollin e humbur nën mbulesën e gjelbër të hashashit është heshtur nga vëzhguesit e brendshëm dhe të jashtëm.

‘Bravo çuna’ ka qenë kolona zanore e një policie me gjasë të rinuar dhe aktive, por mbetja te huqet dhe hilet e vjetra ka kaluar pa debat. Ajo që, as është rinuar as vjetëruar, por ka mbetur e njëjtë, është zakoni i palëve që ndërrojnë vendet në pushtet, tek e mbrojnë Policinë kur janë në qeveri dhe e sulmojnë në opozitë. Të njëjtën gjë bëjnë edhe mbështetësit respektivë partiakë.

Bëni dallimin mes 21 janarit dhe 8 dhjetorit për shembull. Ata që ishin pro-jetë dhe godisnin e digjnin çdo gjë materiale që u dilte përpara 9 vite të shkuara, para pak ditësh u bënë me policët dhe pemët dhe çdo gjë përballë tyre e konsideruan si relative.

A është kjo Policia që duam? Dhe, çka është më e rëndësishme, a mos duam ne një Polici e cila duhet të jetë e jona, në kuptimin që e parë të këtij përemri pronor. Pra të jetë ekskluzivitet i yni dhe i palës sonë.

Ndërkohë që arma e policisë duhet të jetë përkatësi publike. Deri më tash nuk ka arritur të jetë e tillë. Nën drejtimin e ministrit që iku edhe më pak e tillë.

Ditari politik

Të fundit