Instituti Konservator Shqiptar: Një Shtyllë për të Ardhmen e Konservatorizmit në Shqipëri

Nga Nikolla Kedhi

Shqipëria ndodhet në një udhëkryq, duke u përballur me sfida që rrezikojnë demokracinë, stabilitetin politik, zhvillimin ekonomik dhe kohezionin social. Nga shpopullimi dhe stanjacioni ekonomik, te ndikimet e rritura të fuqive të huaja, e ardhmja e vendit varet nga përkushtimi ndaj vlerave themelore që kanë mbështetur historikisht shoqëritë e lira dhe të pasura. Për t’iu përgjigjur kësaj nevoje urgjente, kemi themeluar Institutin Konservator Shqiptar (ACI) në bashkërendim me partnerët ndërkombëtar dhe faktorë të ndryshëm shqiptarë, si një think tank konservator, i përkushtuar për të formësuar lëvizjen konservatore në Shqipëri dhe më gjerë në Ballkan, si dhe për të ndihmuar partinë kryesore të së djathtës shqiptare.

Misioni i ACI-së është i qartë: të forcojë konservatorizmin dhe qendrën e djathtë në Shqipëri duke promovuar qeverisjen demokratike, sigurinë kombëtare dhe prosperitetin ekonomik. Instituti synon të frymëzojë një përqendrim të ri te vlerat e tregjeve të lira, lirive individuale, qeverisë së kufizuar, dhe shenjtërisë së pronës private dhe familjes.

Këto parime nuk janë ideale abstrakte, por themele praktike për t’u përballur me sfidat urgjente të Shqipërisë. Në një kohë kur stabilokracia—regjime që prioritizojnë stabilitetin mbi qeverisjen demokratike—përbën një kërcënim real, dhe aktorë gjeopolitikë të huaj synojnë të ndikojnë në çështjet e brendshme, ACI është i përkushtuar të mbrojë sovranitetin, integritetin territorial dhe krenarinë kombëtare të Shqipërisë.

Instituti Konservator Shqiptar përfaqëson diçka të re në arenën publike të vendit. Ai reflekton një përkushtim më të thellë për të forcuar dhe konsoliduar vlerat konservatore në Shqipëri, për të kujtuar dhe mbrojtur trashëgiminë e të djathtës në vend dhe për të ndihmuar në forcimin e saj për dekadat e ardhshme. Instituti është bashkëthemeluar nga një ekip dinamik profesionistësh dhe intelektualësh të rinj, duke përfshirë Nikola Kedhi, Ted Kopliku, Enri Ceno, Lindita Komani dhe Gent Trenova. Së bashku me disa nga ekspertët më të mirë që ofron vendi në fusha te ndryshme, si zoti Myqerem Tafaj, zoti Florion Mima, zoti Erion Dasho,zoti Albert Bikaj, zonja Melisa Braci, zoti Alfred Pllumbi, zonja Ina Xhakollari e të tjerë,  ata sjellin një pasuri të jashtëzakonshme përvoje, integriteti dhe vizioni.

Një pjesë e konsiderueshme e këtij ekipi ka dëshmuar tashmë aftësitë vazhdimisht me daljet dhe kontributin e tyre publik apo duke organizuar disa nga eventet më të rëndësishme në Shqipëri.

Sfida me të cilat përballet Shqipëria sot kërkojnë jo vetëm masa reaktive, por edhe një vizion të plotë për të ardhmen. ACI është i përkushtuar të formësojë politika që i adresojnë këto sfida direkt. Veprimtaria e institutit përfshin fusha kritike si politika ekonomike, siguria kombëtare, arsimi, shëndetësia, qeverisja e mirë dhe marrëdhëniet ndërkombëtare.

Në zemër të vizionit të ACI-së është familja, e parë si gur themeli i një shoqërie të suksesshme. Duke prioritizuar politikat miqësore për familjen, ACI synon të ndryshojë tendencat shqetësuese si rënia e lindshmërisë dhe emigracioni masiv.

ACI është gjithashtu i përkushtuar për të edukuar brezin e ardhshëm të liderëve konservatorë, duke i pajisur ata me njohuritë dhe aftësitë e nevojshme për të trajtuar çështje komplekse dhe për të sjellë ndryshime kuptimplota. Përmes kërkimit, diskursit publik, dhe bashkëpunimit ndërkombëtar, ACI synon të ndërtojë një Shqipëri të begatë që qëndron e fortë brenda një Europe të bashkuar, me lidhje të fuqishme me Shtetet e Bashkuara, Mbretërinë e Bashkuar dhe demokracitë e tjera Perëndimore.

Instituti Konservator Shqiptar nuk është vetëm një think tank; ai është një partner strategjik për rrjetet e qendrës së djathtë dhe konservatore në mbarë botën. Duke njohur rëndësinë e bashkëpunimit për adresimin e sfidave të përbashkëta, ACI është i gatshëm të punojë me institucione dhe liderë të një mendjeje në Europë, Shtetet e Bashkuara dhe më gjerë.

Për vite me radhë, shumë prej themeluesve të ACI-së kanë kultivuar marrëdhënie të forta dhe miqësi të mira me organizata konservatore të njohura, si Heritage Foundation, Danube Institute, Nazione Futura, CPAC, Center for Fundamental Rights, Ordo Iuris Institute, the Republic,Americans for Tax Reform e të tjerë. Këto partneritete jo vetëm që kanë pasuruar diskursin konservator të Shqipërisë, por gjithashtu pozicionojnë ACI-në si një zë të besueshëm dhe me ndikim në rajon, dhe një pjesëtare e rrjetit të gjerë të djathtë botëror.

Themelimi i Institutit Konservator Shqiptar shënon një moment vendimtar për lëvizjen konservatore në Shqipëri. Me një mision të rrënjosur në parime të përhershme dhe një vizion për një të ardhme më të ndritur, ACI është i pozicionuar mirë për të luajtur një rol udhëheqës në formësimin e peizazhit politik, ekonomik dhe social të vendit për dekadat që do të vijnë.

Duke nxitur një përkushtim të ri ndaj vlerave konservatore, duke mbështetur Partinë Demokratike të Shqipërisë, dhe duke bashkëpunuar me aleatët ndërkombëtarë, ACI synon të bëhet institucioni kryesor konservator në rajon. Përkushtimi i tij ndaj integritetit, seriozitetit dhe përvojës siguron që trashëgimia e qendrës së djathtë jo vetëm të mbrohet, por të forcohet për brezat e ardhshëm.

Në këto përpjekje, ACI zgjat dorën e partneritetit drejt kujtdo që ndan vlerat tona në Shqipëri dhe në komunitetin konservator global, të gatshëm të punojmë së bashku për të promovuar vlerat tona të përbashkëta dhe për të ndërtuar një të ardhme më të sigurt dhe të begatë për Shqipërinë dhe botën.

/Nikola Kedhi – Drejtues Ekzekutiv i ACI